Мэргэжлийн сүмогийн 68 дахь их аварга Асашёорюү Д.Дагвадорж их сүмог орхиж зодог тайлж байгаагаа мэдэгджээ. Тэрээр Японы сүмогийн холбоонд албан ёсоор хүсэлтээ гаргасан бөгөөд Би гэм буруугаа ойлгож байна. Зодог тайлснаар миний сэтгэл санаа ариуслаа” хэмээн хэлжээ. Д.Дагвадорж мэргэжлийн сүмод 25 удаа түрүүлж, түүхэнд гуравт бичигдэх амжилт үзүүлээд байсан юм. Сүмогийн хүнд ширүүн ертөнцөд өөрийн хүчээр амжилт гаргаж, их аварга хэмээх эрхэм цолыг монголчуудаас анх удаа хүртсэн. Түүний энэхүү зүтгэлийг Монголын төр үнэлж Хөдөлмөрийн баатар, гавьяат тамирчин цол хүртээсэн. Түүний хэзээ ч давтагдашгүй хурц дайчин, уран мэхийг уралдуулсан барилдаан сүмогийн ертөнцөд шинэчлэл авчирсан гэдэгтэй маргах хүн гарахгүй. Монгол хүний ид хавыг арлын Японд төдийгүй дэлхий дахинаа гайхуулж чадсан түүнд Монгол хүн бүр хайртай байдаг. Тэрээр хоёр орны харилцааны томоохон элч төлөөлөгч байсан төдийгүй “Асашёорюү” санг үүсгэн байгуулж Монгол Улсдаа үлэмж хэмжээний хөрөнгө оруулалтыг татсан аргагүй эх оронч гэдгийг ч бид мэднэ. Мэргэжлийн сүмогийн амьд домог ийнхүү зодог тайллаа.  

Б.Түвшинтөгс