“Хорвоод хосгүй монгол ухаан” гэж хөөрцөглөх хүн цөөнгүй байх юм гээч. Үндэс угсаагаараа бахархалгүй яахав. Гэхдээ юун ч даруу бус юм бэ дээ.

Адгийн бүдүүлэг нүүдэлчин Монгол эрдэс баялгаар арвин гэнэ хөөе. Бурхан тэнэгүүдэд гайхамшиг хайрласанд Чөтгөр миний шээс гоожиж буй.

Монголд сайхан дуулбал сонгодог хууль төрдөг. Уянгалаг хоолойноос төрсөн ухаалаг хууль, сайн барилдвал, зүйл заалтууд нь нэг бүрчлэн хэрэгжинэ. Бөө удган айж цочирдом цамнавал Австралд үер бууж, Хятадын импорт тэнгэрт хадаж, Монголын эдийн засаг 17 хувь өсдөг номтой. Сонгуулиуд манай хөгжил дуучин, бөх, бөө удгандаа оршдогийг нотлов.

Цагаан далаар мэргэлдэг увидастан ховор. Тэр дундаа далыг шатаалгүй цагаанаар нь тайлах хүн бараг үгүй... Х.Уянга хэмээх бүсгүй “Цагаан даланд хамгийн наанадаа хүний есөн үе доторх үйлийн үрийн холбоотой бүх мэдээлэл хадгалагддаг” тухай ярьсан нь олон хүний анхаарлыг татсан билээ гэж сануулжээ.

ОУВС-гийн хөтөлбөрийг эсэргүүцэж буй нам, гишүүд, иргэд бараг алга. Төсвийн алдагдлаа бууруул гэсэн. Аль ч төр засаг иргэдийнхээ татварыг нэмж чадахаас, авилгажсан хүнд суртлын нүсэр аппаратаа багасгаж зүрхэлдэггүй.

Маний үед эх оронч үзлийг Зөвлөлтөд үнэнч, Хятадыг үзэн ядах хоёрхон хатуу хэмжүүрээр оношилж байв. Энэ хоёр шалгуурын болзлыг хангах гэж эдүгээ хойш харж бялдуучлаад, урагш харж омогддог кадрууд тасрахгүй нь гээч.