Үндэстний тойм сэтгүүл № 15 дугаарын “Ишлэл” булан энэ удаа “ХЗДХ-ийн сайдыг хуйхласан 7 хоног” нэртэйгээр хэвлэгджээ. Өнгөрч буй долоо хоногт хэвлэл мэдээлэлд ярилцлага өгсөн ихэнх хүн Ц.Нямдоржтой холбоотой хэт нэг талыг барьсан гэмээр үгс хэлсэн байх аж. Харин сэтгүүлийн редакци тэдгээр хүмүүсийн хэлсэн ярьсанд “Зүүлт” болгож Ц.Нямдоржийн албан ёсны намтарыг www.open-parlament.mn сайтаас бүрэн эхээр нь авч авч оруулжээ.


Цэндийн Нямдорж

Увс аймгийн Малчин суманд 1956 оны 8 дугаар сарын 10-нд төрсөн, эхнэр, хоёр хүүхэдтэй.

Ц.Нямдорж Улаангом хотын нэгдүгээр дунд сургуулийг 1975 онд,  Ленинградын  Улсын их сургуулийг хуульч мэргэжлээр 1981 онд тус тус төгссөн. 

Төрийн сайдаар дөрвөнтөө томилогдсон түшээ

Засгийн газрын гишүүн, Хууль зүй дотоод хэргийн сайдаар гурав, тус яамны тэргүүн  дэд сайдаар нэг удаа, нийтдээ 1990 оноос хойш 2009 оныг хүртэл дөрвөнтөө   томилогдон ажиллаж буй Ц.Нямдорж гишүүн Ленинградад хуульч мэргэжил эзэмшсэн цагаасаа хойш төрөлх салбараасаа “уяатай” яваа нэгэн. Өөрийн эзэмшсэн мэргэжлээрээ бас  засаг төрийн  томилгоогоор ийм олон удаа төрийн сайдаар, тэр дундаа “хууль”-ийн сайдаар ажилласан хүн лав ховор  биз. Монголын толгой хуульчдын тоонд зүй ёсоор тооцогддог түүний товчхон намтрыг харах аваас тун  тодорхой бас тогтвортой хүн гэдэг нь илт мэдрэгддэг. Их сургууль дөнгөж төгссөн цэл залуухан Ц.Нямдорж Улсын ерөнхий прокурорын газарт томилогдохдоо прокуророос  хэлтэс, тасгийн даргаар дэвшин ажиллаж байжээ /1981-1988/. Үүний дараа 1988-1990 онд тэрээр Цэргийн ерөнхий прокурорын нэгдүгээр орлогч болсон байна. Хэдийгээр богинохон хугацаанд уг албан тушаалд ажилласан ч цэргийн хатуухан ёс дэглэм, нарийн дүрэм журам түүнийг хурцалж, зарчимтай, зангарагтай,  ёстой л ясны хуульч болон өсч дэвжихэд нь ихэд нөлөөлсөн гэдэг.

1990 онд Ц.Нямдорж Сайд нарын зөвлөлд мэргэжилтнээр ажиллав. Бужигнаан түрхрээнтэй энэ он түүнд бас нэгэн өөрчлөлт авчирсан нь тэрээр Хууль зүйн тэргүүн дэд сайдаар томилогдсон явдал байв.  Дэд сайдаар хоёр жил хэртэй ажиллаад Ц.Нямдорж 1992 онд УИХ-ын гишүүнээр сонгогдсоноос  хойш парламентад даруй 17 дахь жилдээ суурин буй гишүүдийн нэг бөгөөд  2005-2007 онд УИХ-ын даргаар ажилласан юм.  Өдгөө УИХ-ын гишүүн, Монгол Улсын Засгийн газрын гишүүн, Хууль зүй дотоод хэргийн сайд тэрээр УИХ-ын Төрийн байгуулалтын болон Хууль зүйн Байнгын хороонд харьяалагддаг.

 

Төрийн зарчмыг дээдлэх ухаан     

Улс төрд орохоосоо өмнө Ц.Нямдорж арваад жил хуульч мэргэжлээрээ “хазайлгүй” ажиллаж, тэр үеийн хуулийн томчуудын дэргэд  ихийг сурч мэдсэн аж. Чухам тэр үеэс л хувь хүний эрх ашгаас илүүтэй төрийн зарчмыг дээдэлж явах ухаан түүнд гүн бат суусан байх магадлалтай. “Хуулийг тогтвортой сайн мөрдөх аваас тэр нь үнэхээр хууль болж хэрэгжинэ, дараа нь ёс суртахууны хэм хэмжээ болоод зогсохгүй сүүлдээ зан заншил болж хувирдаг. Хууль гэдэг ийм л чухал зүйл” хэмээн  тэрээр хэлдэг.

Зарим нэг нь   хатуу хөтүү хэмээн  өөлдөг  ч Нямдорж шулуухан зантай  омголон л хүн. Хэлсэн ярьснаас нь эх орон, элгэн нутаг нь үнэртдэг монгол зан түүнд бий. Тэр нэгэнтээ “эх орон амьсгалах агаараас эхэлдэг шиг санагддаг” гэж хэлсэн. Тал, хангайн нүүдэлчин монголчуудын эртний улбаат соёл иргэншил мартагдах тийшээ бүдгэрэн байгаад сэтгэл  зовниж явдаг эрхэм гишүүн  уран барилгыг   шимтэн сонирхдог.   Энэ зуурт өгүүлэхэд Ц.Нямдорж гишүүний хуульчийн мэргэжил эзэмшсэн  Ленинградын  их сургуулийг В.Путин, Д.Медведев нар төгссөн юм билээ. 

Шагнал:

·    2001 онд Хөдөлмөрийн гавьяаны улаан тугийн одон

·    2001 онд Ардын хувьсгалын 80 жилийн ойн хүндэт медаль

·    2006 онд Их Монгол улс байгуулагдсаны 800 жилийн ойн хүндэт медаль 

·    2009 онд Монгол Улсын гавьяат хуульч


И-мэйл хаяг: nyamdorj@parliament.mn