Шинэ засаг хэмнэхээс ажлаа эхэлж байна. Хуучин хотын дарга зургаан орлогчтой байсан бол шинэ нь “хайран сайхан эрх мэдлийг ийм олон хүнтэй хуваахгүй” хэмээн дөрөв болгожээ. Тэдний заримынх албан тушаалын нэрийг өөрчилж, “хотын орлогч хэмээх төслийн дарга” гэж авгайлсан учраас хуучнаасаа бүрч цөөхөн орлогчтой хэмээн тайланд тусгах юм байна.

Ингээд зогссонгүй, хотын Батболд дарга маань өөрийнхээ албан тушаалыг “Улаанбаатар төслийн захирагч бөгөөд нийслэл төслийн дарга” хэмээн нэрлэснээр хотын хамгийн том албан тушаалын орон тоог цомхтгон хэмнэжээ.

Хэмнэх, цомнох хорхойтой дарга маань нэрийнхээ эхний хэсэг ба овгийн товчлолыг заагласан цэг зэргийг үрэлгэн тэмдэглээнд тооцон хасч, гарын үсгээ “Суболд” хэмээн татах болсноор захирамж тутмаас 0.0000099 мл принтерийн хор ба монбланы бэх хэмнэж, хэмнэсэн мөнгөө төл хүлээн авах, хонь хяргах ажилд хандивлах болж гэж.

Мөн хотын даргын малын талын мэргэжлийг илүү хотлог харагдуулахын тулд зарим нэр томьёог өөрчлөх захирамж гаргасан гэх. Жишээлэхэд, зоотехникч гэдэг үгийн эхний гурван үсгийг цифрт шилжүүлэн умшиж, 300техникч(гурванзуунтехникч) гэж хэлж заншихаар журамлажээ. Хотшсон, техникшсэн удирдагч ч өөр байдаг юм байна аа.

Түүнчлэн малын эмчийг малын инженерт тооцохоос гадна хонь гаргахыг мал задалж зарах, хонины гэдсийг шалаанк, малын давсгийг амьтны радиотор болгож томьёолохоос эхлээд бод малыг жийп мал, ачлагын тэмээг траак, богийг седан сүрэг гэх болсон гэлцэнэ.

Дэлгүүрт зарж байгаа махыг “Малыг сэлбэг”, “хүнсэнд зориулсан малын эд анги” гэж үзэхээс эхлээд албан хаагчдын гуанзанд байгаа хоолыг “хүний биеийн шатах, тослох материал”, жижиг буфетийг “кофе колоонк” болгохоор захирамжилжээ.

Хөдөөний ах дүүс нь хүндлэн үнхэлцэг зүрх чанаж дайлсан явдлыг “седан малын сальниктай поршень идээд” хэмээн гайхуулсан дуулдав.

Сая, даншгийн наадмаар л гэхэд, “Морины уралдааныг “био ралли” гэж нэрлэнэ. Би инженер хүн мэдэж байна” гэж зүтгээд, цаадуул нь Чой хамбатай хавсран хорьж баймаажин болиулсан юм байх. (Нээрээ, хотын дарга маань хамбыг “бурхны инженер”, харин лам нарыг “бурхны техник ажилтнууд” хэмээн дуудаг болсон юм гэсэн).

Энэ бүхнийг манай хотын удирдлага мэргэжлийн(инженер техникийн) болж байгаа явдал гэж судлаачид хэлж байна. Бас “өнөө” Сундуй маань ч мэргэжлээрээ ажиллаж “Аз жаргалын хотхон” аль нэг газар дээрээ барихаа мэдэгдсэн байна лээ.

За, бас манай шинэ засгийн газрын инфляцтай тэмцэх арга нь ч өвөрмөц харагдана. Хуучин засгийн газар төгрөгийн ханшийг сулруулж байсныг өөрчилж, оронд нь долларын ханшийг чангалах арга хэмжээ авч эхэлсэн байна. Эдийн засагчид нь үүнийгээ “Долларыг нисгэж алах тактик” хэмээн нэрлэж байгаа ба чоныг үргээж авлах ардын аргаас санаа авсан зүйл аж.

Мэргэжлийн засгийн газар байгуулах хүрээнд мэргэжлийн уяач нараар засаг бүрдүүлсэн нь их учиртай юм байна. Ер нь бол хөгжил гэдэг тодорхой утгаараа уралдаан учраас хөгжлийг хурдлуулж чадах хүн нь яах аргагүй уяач нар болж таарч байна.

Манай эдийн засгийн уяач нар морийг хурдлуулахын тулд сойдог шиг, эдийн засгийг ч бас сойх учиртай гэдгийг номлож байна.

Өчигдрийн, засгийн газрын хуралдаан дээр “Инфляци бол эдийн засаг илүү жингээ хасч, сойлго орж байгаа шинж. Улсын статистикийн дүнгүүдийг Морины шинжийн сударт хөрвүүлж үзэхэд Засгийн газрын сойлго гүйцэх яагаа ч үгүй байна. Ер нь эдийн засаг хичнээн хөнгөн байна төдийчинээн хол явдаг. Унаач хүүхэд хөнгөн байхын хэрээр морь хол давхидаг шиг ДНБ бага байхын хэрээр эдийн засаг хол очиж унадаг номтой. Одоогийн нэг хүнд ногдох ДНБ манай наадмын эдийн засагт хүнддэхээр байна” гэхчлэн хуучилсан гэлцэж байна…Үнэхээр л мэргэжлийн засгийн газар ажгуу.