-Тэрээр улс болоод хувь хүнд 150 сая төгрөгийн хохирол учруулаад оргон зайлсан юм-

Үйлдвэр худалдааны яамны Төрийн нарийн бичгийн даргаар ажиллаж байхдаа албаныхаа олон зуун сая төгрөгийг  хувьдаа завшсан хэрэгт холбогдоод гадаад руу оргон зайлсан  Д.Сүрэнхорыг өнгөрсөн бямба гаригт буюу энэ сарын 13-нд Монголын тагнуул, цагдаагийнхан баривчилсан байна. Түүнийг “Чингис хаан” олон улсын нисэх буудалд буухад нь баривчилсан бөгөөд тэрээр Австриас ирсэн байжээ. Одоогоос таван жилийн өмнөөс түүнийг Интерполоор эрэн сурвалжилж эхэлсэн. Д.Сүрэнхор Үйлдвэр худалдааны яамны Төрийн нарийн бичгийн даргаар ажиллаж байхдаа байгууллагдаа 100 орчим сая төгрөгийн хохирол учруулсан юм. Тэрээр энэ мөнгөөрөө БНСУ, Макаод казино тоглон алдсан гэдгээ хүлээн зөвшөөрч байсан билээ. Тухайлбал, яамандаа их засвар хийхээр төсөвлөсөн 60 сая төгрөгөөр казино тоглоод алдсан бол албаны хэрэгцээний “Ланд Круйзер” автомашиныг тоглоомынхоо өрөнд өгсөн байна. Мөн хувь хүн, найз нөхдөөсөө зээлсэн, луйвардсан мөнгө гэхэд л 50 орчим сая төгрөг гэдгийг цагдаагийнхан хэлж байна. Ийн улсад болоод хувь хүмүүст нийт 150 орчим сая төгрөгийн хохирол учруулаад оргон зайлсан Д.Сүрэнхорыг таван жилийн дараа эх орондоо ирэхэд нь баривчиллаа. Түүнийг шууд Ганцхудаг дахь Цагдан хорих төвд саатуулсан байна. Тэрээр гэрээрээ орохыг хүссэн ч тагнуул, цагдаагийнхан үл зөвшөөрчээ.

У. Шагай