Өвөрмонголын иргэн Т.Соёлт согтуугаар таксины жолоочийг зодож танхайрчээ. Тэр ч бүү хэл тэдний маргаан, зодооныг зохицуулахаар ирсэн Баянзүрх дүүргийн цагдаагийн хэлтсийн албан хаагч Э-гийн хувцсыг урж, хэл амаар доромжилжээ. Тэрээр албан үүргийнхээ дагуу шаардлага тавьсан цагдаагийн алба хаагчийг “Чамд хэдэн төгрөг хэрэгтэй юм. Чамайг худалдаж авья” гэж хүртэл тохуурхсан байна.Тиймээс Т.Соёлтыг Баянзүрх дүүргийн шүүхийн шүүгч Оюунгэрэлийн шийдвэрээр танхайн хэрэгт нь 30 хоног саатуулахаар болсон байна. Т.Соёлт нь өмнө нь өөрийн хамсаатан Н.Баатарын хамт “Популярком”-ын гэх дуулиант хэрэгт холбогдож байсан билээ. Тэд 2,2 тэрбум төгрөгийн гаалийн татварыг нуун дарагдуулаад оргон зайлсан бөгөөд саяхан гэхэд л Т.Соёлтын эзэмшлийн автомашины нөөц дугуйнаас их хэмжээний хар тамхины төрлийн бодис олдсон тухай дуулиантай мэдээлэл тархаж байсан билээ.


У.ОД