Манай шинэчлэлийн Зас­гийн газар анх удаа улс орон даяар нээлттэй хуралдав. Мэдээж олон нийт үзэгдлийнх нь хувьд нэн таатай хүлээж авч байна. Ийнхүү гэнэт хаал­га цонхоо дэлгээтэй сууж бай­гаад хуралдсан нь Монгол Ул­сын Ерөнхийлөгч Засгийн газ­рын хуралдаанд оролцсонтой шууд холбоотой нь ойлгомж­той. Энэхүү сонирхууштай ху­ралдаанаар хэлэлцсэн асуу­дал одоогоос нэг жилийн өмнө Ерөнхийлөгчийн санаачилсан Агаарын бохирдлыг бууруулах Үндэсний хорооны ажлыг хэ­лэл­цэх байсан нь бүр ч анхаа­рал татав.

Манай хуйхалдаг Ерөн­хий­лөгч хойморт нь орж ирээд суучихсан нь хөөрхий сайд нарын өвдгийг чичрүүлж буй нь харахаас илт. Цөөнхийн байр сууриас юу ч шалтгаа­лахаа бай­чих­сан, Засгийн газар дангаар даналзаж байх болсон энэхүү ойвор­гон үед Ерөнхийлөгч нөмөр ч болно, нүдүүр ч байна гэдгээ ха­­руулав. Энэ бол яах аргагүй үнэ цэнэтэй акц. Цөөнхөө үл ой­шоох, үл сонсох, үл хүндэт­гэ­хээс өөр аяг үзүүлэхээ боль­сон тэд тэвчин тонгойхоос өөр толгой нь шоволзсон “амьтан” алга байсан нь улсын маань ажил төрөл хий баахан төсөл, хүү нь хоногоор жирэлзэж байгаа бондоос өөр гавьтай юмгүй суугааг нь тод томруу­наар харуулав. Элдэв ТЭЗҮ, ТӨСӨЛ, МӨРӨӨДӨЛ + ПИАР бол өнөөдрийн шинэ монгол­чуу­дад сонин биш зүйл. Тийм цаг явсан ганган яриа хөө­рөөнд нэг их чихээ дэлдийл­гэхээ больсон. Учир нь бид дэндүү олон жил төсөвлөж, төлөвлөж, тойрч хэрэлдэж цагаа үрсэн. Тэрийгээ биеэ­рээ жирэлзэх бүх урсгалаар мэдэрч байгаа учраас одоо эрх барьж буй нөхдөөс үр дүн л шаардана. Тэгэх тэгэх­дээ нүдэнд харагдах, гарт ба­ригдах  бодит хэмжүүрээр л нэхнэ шүү дээ.

Засгийн газрын гишүүд ажлаа танилцуулж, цаашид ямар арга хэмжээ авах талаа­раа энэ хуралдаанаар ярих гэсэн. Ярих гэсэн хэмээсэн нь ярьсан гэж үзэх сайд бараг байхгүй байсан учраас өгч буй дүгнэлт юм. Тийнхүү бэмбэл­зэж, ээрч муурч суухыг нь Ерөн­­хийлөгч тэвчсэнгүй. Түүний нэг тал ерөөсөө хурд гэж тодорхойлж болохуйц хүн. Тиймээс Ерөнхийлөгч асууж, нэхэж, шаардаж эхлэх нь угаасаа эхнээсээ тодорхой болоод явчихсан. Ингээд сайд нарын танилцуулгатай холбог­дуулан Ерөнхийлөгч шууд шууд асуун, асуулт шигээ яралзсан үр дүн, хариултыг нэхсэн хуралдаан болж, эцэст нь Засгийн газрын хацрыг нь ягаартал зэмлэж, хатуу са­нуул­га өгснөөр өндөрлөв.

Сүүлийн үед солгой хүрд­тэй машины асуудал тойрсон бухимдал иргэдийн дунд үүсч, Хотын даргыг чиглэсэн ши­рүүн шүүмжлэл  өрнөж байгааг бид бүгдээрээ мэдэж байгаа. Энэ асуудлаас болж Ерөнхийлөгч хотын даргыг хатуу үгээр бөмбөгдлөө.

Тэрээр “Бат-Үүл ээ, солгой хүрдтэй машины асуудлаар санал асуулга явуулсан биз дээ. Иргэдийн 75 хувь нь тат­галзаж байна гэсэн санал өг­сөн. Гэтэл юун дахин санал асуул­га явуулах вэ. Юун буруу талдаа хүрдтэй машин бэ. Энэ хотод хийх өөр ажил  байхгүй байна уу. Хилийн цаана байгаа машины асууд­лыг бод. Хилийн наана ороод ирчихсэн машинтай битгий ноцолд. Агаар, хөрсний бо­хирд­лоос эхлээд асуудал олон байхад ийм асуудлыг яриад сууж байх хэрэггүй” гэж өө­рийн байр сууриа тов тодор­хой илэрхийлэв.

Хилийн чинадаас зовж зүдрэн байж оруулж  ирсэн хуу­чин муу машинуудыг нь явуу­лахгүй гэж хавчиж шах­сан бод­лого явуулж буйд иргэд Баатар Бат-Үүлд тун их гом­долтой байгаа юм.

Хуруу хумсаа хуйхлан, гад­ныхнаас гуйж түйн хөрөнгө босгож, дотоодын төрийн алба­ныхаа элдэв түвэгтэй даваа гүвээ даван, арай ядан барьж босгосныг нь нураана, буулгана, хураана, авна гэж дайрч давшилж байгаад нь мээр Бат-Үүлд манай иргэд дургүйцэж байгаа юм. Ийм хэцүү байдлаас болж үй­мэрч хямарсан иргэд “Ардчил­сан засаг ард түмнээсээ эрх чөлөөг нь хураан авч байна” гэлцэх болсон. Харин ч нөгөө арай гэж түлхэн унагасан коммунизмаасаа дор харгис бодлого явуулж эхэллээ гэж түгших болсон. Ийм санаа сэтгэлийн үймрээн үүссэн үед Ерөнхийлөгч иргэддээ нөмөр болон зогсов. Аливаа дээрээс ирж буй бодлого доо­роо хатуураад л, хавчиж хя­хаад эхэлбэл улс орны уур амьсгал ээдээд эхэлдэг.  

Дараагийн анхаарал татаж буй нэг асуудал бол Засгийн газрын Хэрэг эрхлэх газрын дарга, сайд Ч.Сайханбилэгийн санаачилгаар “Сайтуудын сэт­гэгдлийг нэгдсэн серверт оруулах, хаягжуулах” төсөл юм. Ерөнхийлөгч үүнд ч нэн таа­гүй хандав. Тэрээр “Бү­хэл бүтэн улсын өмнөөс ажил хийж байж ганц нэг хүн, хэсэг хүний шүүмжлэлтэй зуурал­дах хэрэггүй. Үгийг нь хүлээж авч байх хэрэгтэй. Элдэв хэл амыг тоохгүй байсан нь дээр шүү дээ. Сайтуудын холбоо хийх ажлыг Засгийн газрын сайд хийгээд хэрэггүй” гэж зэмлэлээ. Мэдээллийн сай­туу­даар сэт­гэгдэл бичих нэ­рээр бусдыг гутаан доромж­лох, нэр хүндэд байж болшгүй бүдүүлгээр халдах явдал гаарч байгаа учраас нэгдсэн серверт оруулж, нэр, и-мэйл хаяг буюу “буцах хаягтай” сэт­гэгдэл авдаг болъё гэсэн са­налыг Засгийн газар дэвшүүл­сэн юм. Гэвч энэ яв­дал мөн л  эсэргүүцэлтэй тул­гараад байгаа. Нийгмийнхээ нийт гоо зүйд л хөрөнгө оруу­лалт хийх замаар энэ гажиг үзэгдэлтэй тэмцэх байх. Түүнээс биш хү­чээр боомилох бодлого бол жолоо цулбуургүй эрх чөлөөн дунд хорин хэдэн жил дураа­раа дургисан ма­найханд явахгүй л дээ. Хэдэн жилийн өмнө манай ардчиллын нэг лидер “Яая гэхэв дээ, на­майг доромжлох энэ эрх чөлөөг нь би авчралцсан юм” гэж хэлж байж билээ. Одоо бол тэд маань өөр болцгоосон юм даг уу даа.

Ерөнхийлөгчийг Үйлдвэр, хөдөө аж ахуйн сайд Х.Баттул­га дээр ирээд хэрхэх бол гэж улс төрийн ажиглагчид анхаа­рал тавин харцгааж байв.  Учир нь, Х.Баттулгыг хүссэн ч эс хүссэн ч Ерөнхийлөгчтөй хамаатуулдаг зуршил эртнээс тогтчихсон юм. М.Энхсайхан­тай дэгдээсэн “асуудал” нь намжаагүй байгаа энэ үед Ерөнхийлөгч түүнийг  “Нэг л их санаа алдаж, хүн муулсан хүн байх юм. Өмнөх ажлаа хий. Та мал хариуцсан сайд биш хүн хариуцсан, үйлдвэ­рийн сайд. Мал руу биш хүн рүү чиглэсэн ажлаа хий” гэж загнав. Гэхдээ энэ бол зүгээр л дотроо нууж буй хайр юм.  Энэ мэтээр сайд нарыг шүүмжлэл тойроогүй. Ерөн­хий­лөгч эрх баригчдад зо­риулж  “Өмнөх юм ерөөсөө болохгүй байна, өмнөх Зас­гийн газрын ажлыг цэгцлэх гэж бид зовж байна гэж ярихаа зогсоо. Одоо бид юу хийх вэ, ямар гарц байна. Ажлаа ямар хугацаанд биелүүлэх вэ гэдгээ ярилц. Ажил бүрийн ард хариуцах эзэн байдаг. Тий­мээс ажлаа хийж чадахгүй бол хариуцлага тооц, ажлаа өг гэ­дэг зарчмаар явах хэрэгтэй. Дөрвөн жил гэдэг богино хуга­цаа, нэг жилээ ардаа орхиж байна. Тиймээс хариуцсан аж­лаа хийцгээе” гэж тэрээр анхаарууллаа. Засгийн газарт өгсөн Ерөн­хий­лөг­чийн  энэхүү онцгой сануулга Мон­гол Улсын гадаад худал­дааны тэнцэл нэгдүгээр сарын хагасын байдлаар 70.5 сая ам.долларын алдагдалтай гарсан дүн мэдээтэй давхцав.  Арга ч үгүй биз энэ үзүүлэлт бол өмнөх жилээс 27.0 хувиар буурсан үзүүлэлт юм. Гэхдээ эдийн засагчид үүнийг нэг их сүртэй зүйл биш гэж үзэж байгаа байх. Харин тэдний айж буй зүйл хорин хэдэн жил энэ улс орныг үүрч явсан дотоо­дын хөрөнгө оруулагчид, үн­дэс­ний бизнесмэнүүдээ нэг нэгнийх нь захиалгаар унагах бохир бодлого явуулахвий гэсэн зовнил байна. Энэ тухай үнэхээр уулзсан учирсан болгон ярих болсныг бодууш­тай. Ардчилсан нам төрийн эрх аваад л дотоодын хөрөнгө оруулагчдынхаа элэг рүү тийр­сэн бодлого явуулаад эхэлс­нийг тэд ийн шагшран онцолж байна. Нефть импортлогчид руу дайрч, байшин үйлдвэр­лэгчид рүү давшилж, сүүлдээ манай хүнсний бүтээгдэхүү­нүүд дотроос гадагшаа танигд­сан цорын ганц брэнд болох архиныхаа нүүрнээс “Чингис” шошгыг нь хуулж авах юм ч болов. Сар шинээ тэгж хий, ингэж хий гэж зааж зураад л эхлэв. Уг нь ардаа алагчилдаг, алахаас наахнуур хавчдаг ийм бодлогыг бид хүсээгүй. Ард түмнээ амирлуулдаг л Төрийн бодлого горьдож бид саналаа өгсөн. Гэхдээ өнөө­дөр сайхан байна. Манай Ерөн­хий­лөгч Ард түмнээ өмгөөл­лөө.