Сүүлийн үед Ерөнхий сайд С.Баярын эрүүл мэндийн асуудал олон нийтийн анхаарлыг ихээр татаж  байна. Өнгөрсөн өвлийн хамгийн халуухан сенсаациудын нэг түүний мориноос унаж бэртэл авсан талаархи мэдээлэл байлаа. Гэвч тэрбээр хоёр гуравхан хоногийн дараа ажилдаа орж, эрүүл саруул байгаагаа олон нийтэд харуулснаар морь унаж давхисан сахилгагүй Ерөнхий сайдын талаархи сонины цувралуудыг тэгэсхийгээд зогсоосон. Гэтэл энэ удаа ахин „Ерөнхий сайдын эрүүл мэнд асуудалтай байна” гэсэн дуулиан дэгдээд байна. Эхэндээ өвөл мориноос унахдаа бэртсэн хөлнийх нь зөөлөн эдийн гэмтэл сэдэрсний улмаас ажлаасаа түр хөндийрч Солонгос улсад шинжилгээ хийлгэхээр явсан хэмээн тайлбарлагдаж байсан шуугиан уржигдар албаны эх сурвалжийн өгсөн мэдээллээс үүдэн гал дээр тос нэмэх мэт дэвэрч орхив. Эрүүл мэндийн сайд С.Ламбаа тэргүүтэй албаны хүмүүс сэтгүүлчдийг цуглуулан, ярайтал сууж байгаад Ерөнхий сайд С.Баярын эрүүл мэндийн тухай дэлгэрэнгүй “тайлан”-г тавьж нийгмийн амыг ангайлгаж, нүдийг нь орой дээр нь гаргасан нь энэ. Мэдээж ийм хэмжээний алхмыг Ерөнхий сайдтай зөвшилцөлгүйгээр хийхгүй. Ерөнхий сайд өөрөө зөвшөөрөл өгсний улмаас албаны хүмүүс дэлгэрэнгүй мэдээлэл хийсэн байж таараа.

Асуудал нэг талаасаа ийм тодорхой харагдавч нөгөө талдаа харьцангуй соёлжиж, боловсорсон ний­гэм энэ явдлыг туйлын эмзэг хүлээж авч байна. Төрийнхөө нэгэн өндөрлөгийн эрүүл мэндийн талаархи таагүй мэдээллүү­дийг дэлхийтэй хуваалцах шаардлага би­дэнд байна уу. Хэдийгээр манай нийгэм хамаг хаалга цонх нь дэлгээ­тэй ардчилсан нийгэм ч гэлээ бусдын ха­лаас, хэтэвч, ор хөнжил рүү өнгийж халиад, сүүлдээ ана­томийг нь рентгенд харсан лугаа адил эрүүл мэндийнх нь талаар эрээ цээргүй мэ­дээллийг олон нийтэд дэлгэж байдаг ёс зүйгүй явдал руу халь­тираад явчихлаа гэж хүмүүс шүүмжилж байна. Энэ зохисгүй явдлын хэм хэмжээ хэтэрснээс болж нийгмийн сэтгэл зүй тав­гүйтэж, дур­гүйцлийг нь тө­рүүлэх боллоо. Мэдээж үүнд сэтгүүлчид бид буруутай. Бидний буруу үйл ажил­лагаа Ерөнхий сайдыг хү­нийх нь хувьд байж суухын аргагүй шахаанд оруулж, эцэстээ аргаа бараад ийм алхам руу түлхэв үү дээ гэж бодогдоно. Хувь хүний эрүүл мэндийн асуудал бол энэ хорвоогийн хамгийн эмзэг зүйлсийн нэг. Ийм эмзэг зүйлээр тоглох хэрэг бидэнд байна уу. Асуудлын нөгөө талд төрийн тэргүүлэх албан тушаалтнуудын эрүүл мэн­дэд ноцтой асуудал үүсч, цаашид албан үүргээ гүй­цэтгэх боломжгүй болсон тохиолдолд ард түмнээсээ нууж хаалгүй, нийгмийг элдэв таамаг сэжигт автуулалгүй аядуухан мэдэгдэх ёстой төрийн өөрийнх нь үүрэг бий. Харин иймдээ тулаагүй нөх­цөлд хүний амьдралд то­хиолдож болдог ердийн нэг өвчин зовиур илэрсний тө­лөө сүржигнэж, шоудаж, эрээ цээргүй ил задгай мэдэг­дэл хийж суух нь хэтэрхий зүй зохисгүй явдал юм. Лаа­ны гэрэлд ламбада бүжиглэж явахаас өөрийг хийхгүй бай­на хэмээн урьд өдөр нь хэвлэлийн хуудсаар чим­хүүлсэн Эрүүл мэндийн сайд салбарынхаа нөхдийг да­гуулж ирэн хурал зарлаж даарин дээр давс нэмсэн нь өнөө цагийн төрийнхний галбиргүй явдлын жишээг нэгээр нэмлээ.

Сайдын дагуулж ирсэн тусгай эмнэлгийн дарга “Элэг­ний С вирус архи сар­хад хэтрүүлэн хэрэглэснээс болж идэвхждэг үү” гэсэн сэтгүүлчийн зальжин асуул­танд архи хэтрүүлж уувал идэвхжинэ шүү дээ гээд хээв нэг хариулан гэнэдэж хараг­дав. С вирус нь идэвхжээд бай­на гэж өөрсдөө  мэдэгдэл хийчихээд, араас нь архи хэт­рүүлэн ууснаас улам идэвхж­дэг ээ гээд хариул­чихаж байгаа нь „Аан, манай Ерөнхий сайд сархад жаа­хан хэтрүүлээд хөнтөрчих­дөг нөхөр юм байна шүү дээ. Тэрнээс нь л болж элэгний хууч нь сэдэрчихэж” гэсэн мессежийг ард түмэн рүү гэнэн царайлж байгаад нис­гэж орхисон дэндүү муухай хоржоон болов. Ёстой нөгөө янаглан хорлоно гэдэг л энэ байх даа.

Төрийнхөн төрхөө ингэж үзүүлж байхад хэвлэлийнхэн нэрмээс хийгээд өгөхөө яаж мартахав. Өчигдөр өглөөний хэвлэлүүд хамгийн ёс зүйгүй гарчгаар Ерөнхий сайдын­хаа эрүүл мэндийн тухай мэ­дээллийг хачирлажээ. Хүний хувийн нууцыг эрээ цээргүй за­далсан, харахаас дотор эв­гүйцмээр гарчгууд төвийн хэв­лэлүүдийн тэргүүн нүү­рүү­­дийг хулдав. Зөвхөн энэ үзэг­дэл аль нь ёс зүйтэй, соёл­той, хүмүүнлэг сэтгүүл зүйг илтгэж, аль нь увайгүй бо­хир сэтгүүл зүйг хөгжүүлж  бай­гааг дэнслэн харууллаа. Бид бусдын муухайд дуртай атлаа өөрсдийн мууг хара­хаа байжээ. Нэг үхрийн эвэр доргиход мянган үхрийн эвэр доргидог гэдгийг санаж, мэр­гэжлийн нэр нүүрээ хайрлан хамгаалах талаар халуун то­гоондоо ярьж хэлэх цаг ирс­нийг сүүлийн үеийн энэ мэт ёс зүйгүй жишээнүүд то­доос тод харуулж байна. Төр нь ч зөв тунгалаг нүүртэй, сэтгүүл зүй нь ч гэгээлэг зам мөртэй байхсан даа.