Дээрх уулзалтаас хэд хоногийн дараа 8 дугаар сарын 14-нд нэг гайхалтай явдал болов. Тохиолдол ч байж мэднэ. Энэ өдөр бол “Монголын жүдочдын өдөр” бас монгол түмний “Эв нэгдлийн өдөр”, “Бахархлын баяр”-ын өдөр билээ.

Бид нэг хэмжээст хүний амьдралаар амьдарч ирсэн. Одоо гурван хэмжээст амьдралаар амьдрах хэрэгтэй. Энэ нь ухамсар, хайр энэрэл , бүтээлч чанар гурав юм.

1989 онд Энэтхэг улсаас манай оронд суух онц бөгөөд бүрэн эрхт элчин сайд залран ирсэн нь Бурхан багшийн 16 архадын нэг Бакулу архадын 19 р дүр Бакула Ринбүчи Живзун Лувсан Түвдэн Чогнор байсан бөгөөд дараа жил нь манайд ардчилсан хувьсгал ялсан бөгөөд тэрээр арван жил Монголд элчингээр ажилласан нь тохиолдлын гэмээргүй гайхалтай явдал байлаа.

Олонхиороо асуудлыг шийддэг нь ардчиллын зарчим юм. Одоогоор үүнээс дээр юм олоогүй ч гэдэг. Гэхдээ ард түмний олонхи нь тэнэг бол тэнэг л сонголт хийнэ гэж бас ойлгож болно. Энэ дэлхийд ухаантан нь тэнэгээсээ ямагт цөөн байсаар ирсэн. Байх ч болов уу?