Хотын даргыг чөлөөлөх эсэх нь эхний асуудал. Чөлөөлж гэмээн дараачийн томилгооны тухай ярих ёстой. Тэр болтол хотын даргын олон орлогчоос хэн нэг нь үүрэг гүйцэтгэгч хийгээд байж болно шүү дээ. Бидний сайн таних нь нийслэлийн Засаг даргын нэгдүгээр орлогч Т.Даваадалай гэж мэдэхгүй юмгүй, оролцохгүй асуудалгүй “сайн эр” бий. Санкт-Петербургийн Зам Харилцааны Их сургуулийг зүтгүүрийн инженер мэргэжлээр төгссөн, 2017 онд Австралийн Күийсландын Их сургуульд инженер-бизнесийн удирдлага хосолсон мэргэжлээр мастер хамгаалсан гэх мэт, хоосонгүй л нөхөр. Долоо хоног цас цэвэрлэж, давс цацахад үүнээс илүү боловсрол шаардахгүй. Манай Х.Нямбаатар ч гэсэн хувийн дээд сургуульд эрх зүйчээр сурсан боловч болгоод л байсан. Тэгж байтал нам, засаг маань эрх биш дараагийн хүнийг томилж л таарна...
МАН дотор М.Энхболдын, У.Хүрэлсүхийн гэдэг хоёр бүлэглэл байсан бол одоо Л.Оюун-Эрдэнийн гэдэг гурав дахь бүлэг гарч ирж байгаа юм байна. Олуулаа байхын зовлон юм даа.
Ер нь бол манай төрийн томчууд тэр цаг байтугай үнэтэй зүйл эдэлж хэрэглэдэг. Тэрийг нь хэний ямар мөнгөөр авсан барьсан гэж асууж сурагладаг, тэр нь хашиж байгаа ажил, албан тушаалд нь зохимжтой эсэх талаар санаа тавьдаг соёл манайханд бараг байхгүй.
Д.Сарангэрэл гишүүнд “Нэг амиар хоёр удаа баатар болдоггүй” гэдэг хуучны үгийг сануулах нь илүүц биз. Тэрэндээ тулбал “Ковидын үед нэг хүнийг найман саяар эмчилж байсан баримтаа шалгуул” гэдэг хүмүүс ч бас олон байгаа.
Хэвлэлийн эрх чөлөөг төр хамгаалдаггүй, төрөөс хамгаалдаг юм. Бид эрх чөлөөгөөр өлсөөгүй, цангаагүй. Эрх чөлөөний мэдрэмжээ гээсэнд хамаг учир байна. “Үнэгүй хоол зөвхөн хулганы хавханд бий” гэдэг ч худал үг. Хулгана амиараа төлсөн байдаг шүү...
С.Ганбаатар гишүүний "олон талт" байдал, хувийн үзэл бодол, тодорхой асуудлуудаар илэрхийлсэн улс төрийн байр суурь зэрэг нь түүнийг тодорхойгүй нэг гэмт хэрэгт буруутгах, сэжиглэх үндэслэл биш. Хэрэв гэмт хэрэг үйлдсэн бол тэрийг нь хуулийн дагуу шалгаад нотлох ёстой. Түүнээс өмнө хувь хүнийх нь зөрчилтэй байдлыг олон нийтийн дунд хаяж өгөөд, нийгмийн сүлжээгээр "буллидэж", эчнээ ял оноох нь Үндсэн хуульт засаглал, ардчилсан нийгмийн мөн чанар биш юмаа л гэж. Зорилго нь аргаа зөвтгөхгүй.
