Манайхан бол аль ч шонхорт, тэр тусмаа Амарын шонхорт гар хүрдэггүй эртний сайхан уламжлалтай. Гэтэл Идлэг шонхор маань араб наймаачид, төр болоод хүмүүний шуналын хайчинд өртсөөр буйг дашрамд тэмдэглэхгүй өнгөрөөж эс чадав.
Африкийн үчимбэр бээр Мийнхэн овгийнх учраас догшин, хурдан, хүчирхэг бөгөөд элдэвтэй махчин амьтан.
Гэрэл зураг сонирхогч эгэл миний бие саяхан дэлхий даяар болоод манай оронд тэмдэглэж өнгөрөөсөн “Биологийн төрөл зүйлийн өдөр”-т зориулан Бльюмон дахь “Норфэй арт” галлерейд ан амьтан, шувуудын гэрэл зургийн “Эс хайрлахын аргагүй ертөнц II” бие даасан үзэсгэлэнгээ гаргасан юм. Анхны бие даасан үзэсгэлэнгээ 2014 онд гаргасан болой.
Мандалын зүрхэн анир, сүр сүлд, өршөөл, өнгө, үнэрийн ивгээлд наадуулж, цэнгэг агаар, амьд рашаан, зэрлэг тошлой, үхрийн нүд, чацарганы дээжээр тэтгэж өсгөсөн аав, ээжийнхээ ач буянд залбирч баршгүй.
Хэдхэн хором амсхийгээд өндийтөл "түс түс" хийх битүү чимээ чих дэлсэв. Ойлгомжтой. Мөргөлдөөний анир. Би ч юлган ухасхийж мацсаар босоо ханан хадны бөгс ороож зургийн зэмсгээ түлхэсхийн өнгийж шагайв. Нэг аргалийн толгой, бас нэгнийх нь зоо цухуйж харагдах. Хөнгөн бор манан сэмрэн бууж, цас намуухан бударч эхлэв. Түрүүчийнхээс хавгүй задгай түсхийх чимээ цуурайтлаа. Нөгөөх хоёр аргаль ч давхийж зүүнш эргэх мөчид хоёр угалз мөргөлдсөөр дуранд орж ирэх нь тэр. Орооны явдалд халуурч “нударга” зөрүүлж эхэлжээ.