Төр хүнийг дээрэмчид болон гэмтнүүдээс, Үндсэн хууль хүнийг төрөөс хамгаалах л учиртай. Хүний эрх ямар ч төр, нийгмийн эрхээс давуу. Дарга мяндагтан, хэргэм зэрэгтэнгүүд бие биенийхээ “но”-г дэлгэж, өөр хоорондоо барьцаалагдсан ичгүүр сонжуургүй тонуулчид болсон нь тодорсоор, илэрсээр...

Хүний амьдрал бол сонголт. Албин бүлэглэл, золбин хамсаатнууд хийрхээд байгаа нь сонгогчдын буруу. Сонгогчид нь ямар байна, депутатууд нь тийм байгаа юм. Эхлээд хүн бүр өөрийнхөө төлөө санаа тавиад, өөртөө хүндэтгэлтэй хандаадхаач ээ гэж хүн болгоноос хүсье.

Хагацашгүй сайн хүндээ хэлшгүй муу үгийг бүү гэж нэг том философи байдаг. Харин би бээр хагацашгүй дархан эрх чөлөөнийхөө төлөө хэлэх ёстой үнэн үгээ хэлнэ. Миний дотны байсан нэгэн дүү хүү намайг “Та насаараа Галаагаараа явах юмаа, дандаа Галаагаараа байх юм уу?” гэж ёгтолж, зэмлэх аястай хэлж тохуурхаж байсныг саналаа. “Илүү сартай зун” киноны Галбадрахын дүрээр хэлж байгаа нь тэр.

Ерөнхийлөгчийн хамгийн гол үүрэг нь гадаадад ч, дотоодод эв нэгдэл, энх амгаланг хамгаалах, нандигнах, өмөөрөх. Өөр юу ч биш шүү.

Өнөөдөр социализм, коммунизм, фашизм, национализм, алтриузм, коллективизм аагиж ноёрхсон хэвээрээ байна. Миний итгэж байгуулсан АН-ынхан бие биенийгээ золиослогчид болж хувирлаа.

Манай Монголын засаглал дандаа ямар ч үзэл санаагүй буруу номын халдвар, халдлагыг дуртай шүүрч авах юм даа...Дээр өгүүлсэн вирусын болоод суртаалын халдварыг уухайн тас шүүрэн авч мунхаглалд идэгдэн эрх мэдэл, ноёрхлын гаж дон тусаад эдгэрэхээргүй болжээ.