Хэн ч бай өөрийнхөөрөө амьдарч, аз жаргалаа өөрөө цоглоох цулбуурыг хүмүүст өөрсөнд нь атгуулаад л орхи. Харин хуулийн дор хэн бүхэн тэгш бөхийх бас өндийх учиртай. Хуулиар зөвшөөрөгдсөн л бол хувь хүн юуг ч хийж болно. Хуулиар зөвшөөрөгдөөгүй байхад зориуд өөрчилж байгаад хүнийг харгислагч бол төр. Ер нь Үндсэн хууль бол хувь хүний эрх, эрх чөлөөг төрийн харгислалаас хамгаалсан гэрээ. Үндсэн хууль нь дарга нарт өгсөн бэлэг сэлт биш учраас түүнийг дураараа өөрчилж болдоггүй!
Хүмүүсийн амь амьдралыг өөрийнхөө хэрэгцээ гэж үзэж албан тушаалаа ахиулах гишгүүр болгож, дарангуйллаа инээмсэглэн тогтоодог саарлууд бол дэлхийн түүхийн хар нөхөөс юм шүү!
Өөртөө итгэдэггүй, ид шидэнд итгэгчид, ээжийгээ шүтдэггүй, бурхан шүтэгчид, өөрийгөө хайрладаггүй, өрөөлийг хайрлагчид, өөрийгөө боддоггүй, бусдыг бодогчид, өөрөөрөө бахархдаггүй, өөр бусдаар бахархагчид л хамгийн туушгүй, байр суурь нь тодорхойгүй, тулхгүй хандлага гаргадаг болой...
Хүн өөрийнхөө баялгийг өөрөө бүтээхээр ирсэн бодгаль.
Ард түмний төлөө гэсэн ерөнхий уриатай хоосон амлагч популистууд золиос нэхэн түүнийхээ мөнхийн манаач болж хүний бүтээн босгосон гийгүүлэнд цээжээ дэлбэртэл, тархиа задартал атаархаж байгаа нь эмгэнэлтэй.
Хүний эрхэнд тамлагдаж зовсноос өөрийн эрхээр өөдөлж “зовсон” нь дээр хүмүүс ээ! Хувь хүнийг харгислал хүчирхийллээс, өмч хөрөнгийг дээрэм тонуулаас хамгаалдаг хэний ч, хаанахын ч хараат бус цагдаа, шүүх, прокурортой байхад гүйцээ.
