Тегеранд өглөөний наран мандаж байна. Би зочид буудлынхаа тагтан дээр гарч харлаа. Эгц өөдөөс мөнх цаст өндөр уулс сүндэрлээд, их ой тайга хөхрөн харагдаад, 40 мянгатынхаа тагтан дээрээс 10-аад жилийн тэртээ эгц урагшаа харахад зундаа бол Богд уул маань нэг иймэрхүү л санагддаг байсан даа.

Нар дээр гарсны дараахи Тегеран. Тегеранд очоод төрсөн миний анхны сэтгэгдэл бол энэ хот яав ч лалын, арабын, дорно дахины хот биш юм, үндэстэн угсаатан, шашин-соёлын хувьд маш өвөрмөц хот юм гэж ойлгосон, элдэв юм унших тусам тэр нь бүр нотлогдож байна.

Оройн наран шингэж буй Тегеран. Хотын гудамжаар нь давхиж явахад харьцуулалт хийх элдэв зүйл надад бишгүй ажиглагдаж байлаа. Хотын эргэн тойрон өндөр уулс сүглийх нь 4 уулаар хүрээлэгдсэн нийслэл хотыг маань ч санагдуулах шиг.

Ерөнхийдөө европ маягийн хот юм. Байшин барилга нь европ ур хийцийнх зонхилж байна. Хот байгуулалт, зам харгуй, цэцэрлэг нь ч хуучны Европыг санагдуулам. Энэ утгаар би Тегераныг лалын, арабын, дорно дахины хот биш гээд байгаа юм.

Хэдийгээр Тегеран нь европжуу хот мөн ч гэлээ үзэл суртлын зорилгоор босгосон ийм ухуулах самбар, хана хаа нэгтэй таарч байна. Ирактай хийсэн дайныхаа сурталчилгааг үргэлжлүүлсээр байх шиг.

Ираныг сонирхох шалтаг шалтгаан бол Ираны лалын хувьсгал байж болох. Энэ хувьсгалын удирдагчид, тэдний оюун санааны удирдагчдыг тахин шүтсэн ийм зураг самбар бишгүй нэг тааралдаж байлаа. Энэ бол Тегераны нэг дүүрэг дэх мечет.

Тегеранд очиж үзүүштэй дурсгалтай нэгэн газар байна. Зам дагуу юм. Зардал чирэгдэл орохгүйгээр гуравхан ам. доллараар (30 мянган иран риал) үзчихэж болно. 1971 онд Ираны хаант ёсны 2500 жилийн ойгоор босгосон гэж байна. Эрх чөлөөний цамхаг – Азади тауэр. Ираны тухай гадаадын ТВ-үүдийн мэдээнд байнга гаргадаг даа, 4 тийшээ алцайлгаж босгосон тэгш оройтой, шаргал өнгөтэй, том арктай хөшөөрхүү барилга байдаг. Түүний орой дээрээс Тегеран хот тэр чигээрээ хэдэн тийшээ харагдаж байна лээ.

Иран бол ерөнхийдөө их уулархаг орон юм. “Их Тегеран”-аас гараад хойшоо хэсэг явтал тээр дээр ийм сайхан гүүр харагдаж биднийг алмайруулав. Үүлэн дунд хадан цохио сүглийгээд, нов ногоон уулс, наана нь зунаараа нов ногоон ой, үнэхээр үзээд ханашгүй.

Хомейнийн бунханд зочиллоо. Тэр нь Тегеран хот, Хомейни олон улсын аэрпорт хоёрын замын дунд байрлана. Шарил нь ногоон хамба хилэнгээр хучигдаад маш том шилэн хоргонд, тэр хорго нь маш том мечет дотор байна. Тэр ариун дагшин газар, мечет дотор зураг авахыг хорьдог тул гадна талд нь буй Хомейнийн асар том зурагны өмнө патиараа татуулсан маань энэ.

ТЕГЕРАН – ЛАЛЫН, АРАБЫН, ДОРНО ДАХИНЫ ХОТ ЯАВ Ч БИШ ЭЭ

Сэтгэгдэл (0)