Өнгөрсөн зууны харанхуй бүдүүлэг Монголын балчир хүү Сүх улс төрийн туршлагагүйдээ гэнэдэж Бодоог хөнөөх улаан оросын хуйвалдаанд санамсаргүй урхидуулсан бүдэг ул мөр буйг зарим түүхчид шивэгнэх болов. Феодализмын үед байтугай социализмын үед ч манай удирдагчид хууртаж байлаа.

Ю.Цэдэнбалыг огцруулсанд гомдоод явдаг хүмүүс бий. Намын хянан шалгах хороо гэгч аймшигт газрын орлогч, Цэдэнбалын нутгийн Н.Цэрэнгийн ярилцлага (“Өдрийн сонин” 2015-03-17,18) хоёр орны харилцаанд ямар өгөөжтэйг бүү мэд. Гэхдээ оросууд тоох ч үгүй биз.

Шүрэн хөөрөг бөөр нурууны өвчинд сайн. Шижин хүнд чүнчиг норов ээлтэй.

УИХ-ын сонгуульд өвдөг шороодсон ноёны бөх уурлаад сүйд хийх нь ээ янз нь. Ганцаараа ч туйлахгүй дэг ээ. Урьд нь “гудамжны намууд” хэмээн доромжилж байсан намуудаа цэрэг болгоод дагуулчихаж. Өс хонзон нь туйлдаа хүрсэн салан тусгаарлагч намтайгаа хүзүү сээрээрээ тэврэлдээд жигтэйхэн.

Бид бүхэн бурхангүйчүүдийн замаар замнасан цаг мөчөөсөө эхлэн нүглийг цээрлэлгүй намын хувьсгалт дайчин ухамсраар үйлдэж эхэлжээ. Бурхангүйн үзэл суртлын тогоонд 70 жил чанагдсан монголчууд нүгэл гэдгийг мэдрэх чадвараа эгүрт алдсан байна.

Хүнд суртал авилга хээл хахууль хаана их бугласан бэ гэхэд захын иргэн төрийн албанд гэж шууд хариулна. Энэ дүгнэлттэй хэн ч маргахгүй байх. Авилга, хүнд суртлын үүр бол төрийн албан хаагчдын арми гэж иргэдтэйгээ аль ч нам санаа нийлдэг.