“Өдрийн сонин”-ы даваа гарагийн дугаарт “Э.Бат-үүл бичиж байна” хэмээх нэртэй булан тогтмол гардаг байлаа. Би энэ буланг хөтөлж нийтлэлээ бичдэг байсан юм. Одоо тэр булан “хаагдсан”.

“Төрийн тайган З.Энхболд “тэд яахыг харлаа”” хэмээх нэртэй нийтлэл минь “Өдрийн сонин”-ы 2-р сарын 2-ны даваа гарагийн дугаарт гарсан.

Нэгэнт нийтлэлийг маань нийтэлчихсэн сонины зүгээс гэнэтхэн, “З.Энхболдыг төрийн тайган гэх мэт муухайгаар гутаан доромжлох нь сонины ёс зүйд нийцэхгүй тул дахин ийм нийтлэл явуулбал гаргахгүй ” хэмээн мэдэгдэв.

Тэгээд зогссонгүй, уг нь сонины тавьсан шаардлагад нийцсэн баймаар, “Том дарга Оюун-Эрдэнийн аархлын уг сурвалж” хэмээх, дараагийн дугаарт гарах ёстой нийтлэлийг маань гаргасангүй. Энэ тухай тодруулахад сонины эрхлэгч нь“З.Энхболдын нэр,ирүүлсэн нийтлэлд чинь дахин таагүйгээр дурьдагдсан байна билээ” гэж тайлбарлав.

Эцэст нь “ер нь өөрий чинь нийтлэлийг цаашдаа гаргахгүй ээ” гэв. Ийнхүү “Өдрийн сонин” дахь “миний булан” нэгэнт хаагдсан байсныг би сая ойлгов.

Ерөнхийлөгчийн Тамгын Газрын дарга З.Энхболдыг “төрийн тайган” хэмээн би егөөдөн нэрлэхдээ, тэр ямагт “жинхэнэ ерөнхийлөгч” шиг авирлаад байгааг л дайруулсан хэрэг шүү дээ.

Хаадын “жинхэнэ хаан” нь байдаг хааны шадар хүнийг ингэж егөөддөг. Түүнээс биш, З.Энхболд хөнгөлүүлээгүй эр хүн гэдэг нь мэдээж.

З.Энхболдыг “төрийн тайган” хэмээн егөөдсөн үгтэй, хэд хэдэн нийтлэл маань “Өдрийн сонин”-ы өмнөх дугааруудад гараад л байсан. Гэнэт л “ёс зүйгүй” болоод явчихсан нь жигтэй.

Засгийн Газрын Хэрэг Эрхлэх Газрын дарга Л.Оюун-Эрдэнийг “том дарга” хэмээн ёжлон нэрлэхдээ “Үндсэн хуулиас ч том болсон дарга шиг” авирлаад байгааг дайруулсан хэрэг. Мөн, сүүлийн үед Монгол Улсын Ерөнхий сайд нь У.Хүрэлсүх юм уу? Л.Оюун-Эрдэнэ юм уу? гэж асуумаар болоод байгаа. Л.Оюун-Эрдэнэ даргыг “засгийн тайган” гэж егөөдөж ч болмоор болсон.

Оросын,өдөр дутмын бүх сонин нь Путинээс айдаг шиг, “Өдрийн сонин” З.Энхболд, Л.Оюун-Эрдэнэ нараас айж байгаа нь “том дарга нарын засаглал” буюу автротаризм тогтоод эхэлсний нэг том дохио.“Өдрийн сонин” бол ямарч том даргаас айдаггүй, Монголын ардчиллын хүчирхэг “хоточ нохой” нь байсан юм шүү дээ.

1998 онд УИХ-ын хаврын чуулганаар “Хэвлэл мэдээллийн эрх чөлөөний тухай” хууль батлагдаж, 8-р сардаа хүчин төгөлдөр болсон. Дөрөвхөн зүйлтэй энэ цомхон хуулиар,төрийн байгууллага өөрийн мэдэлд хэвлэл мэдээллийн хэрэгсэлтэй байхыг хориглосон. Уг заалтыг хэрэгжүүлэхээр УИХ болон Засгийн газрын мэдэлд байсан өдөр дутмын сонинуудыг хувьчилсан юм.

Энэ хувьчлалын үр дүнд, том дарга нараас ардчиллыг хамгаалахаар “Өдрийн сонин”

“Зууны мэдээ” зэрэг өдөр дутмын чөлөөт сонинууд төрөн гарсан билээ. Үнэхээр, тэдгээр өдөр тутмын сонинууд өдийг хүртэл ардчиллын найдвартай “хоточ нохой” байж чадсны ачаар эргэн тойрны улсуудад ардчилал мөхөөд эргэн автротаризм, маоизм тогтож байхад Монголд л ардчилал амьдарсаар байлаа.

Гэтэл, шүүх эрх мэдлийг Үндэсний Аюулгүй Байдлын Зөвлөлөөс хараат байдалд шилжүүлсэн гайтай хууль батлагдсанаас хойш Монголын ардчиллын гол баганууд нурж эхлэх нь тэр.

Хичнээн чадваргүй харагддаг ч гэлээ төрийг нээлттэй харагдуулдаг гал голомт болсон парламентийн засаглал устаж байна. Өдгөө УИХ нь шүүх эрх мэдлийг гартаа оруулсан ҮАБЗ-өөс ухаан алдан айдаг болсон.

Путины хүслийг хуульчилдаг Оросын Думтэй адилхан, ҮАБЗ-ийн гурван гишүүний хүслийг хуульчилдаг газар болсон.

Янз бүрийн нээнтэгтэй УИХ гишүүд,ҮАБЗ-д зулгуйдан “том дарга нарын нэр төрийг гутаавал” эрүүгийн хэрэг үүсгэдэг хууль батлав. Энэ хууль батлагдснаар том дарга нарыг нэр төрийг гутаахад захиргааны хариуцлага ноогдуулдаг байсан нь чангарч эрүүгийн хариуцлага ноогдуулах болсон.Саяхан З.Энхболдын нэр төрийг гутаасан хэмээн надад захиргааны хариуцлага тооцон мөнгөн торгууль ноогдуулж байсан бол одоо “төрийн тайган” гэж гутаан доромжилсон гээд эрүүгийн хэрэг үүсгэхээр болж байна.

УИХ мөн “том дарга нарт таалагдаагүй этгээдийг сонгуульд нэр дэвшүүлэхийг хориглох тухай” хууль баталж Үндсэн хуулийг доош нь хийв. Хуулиар гэм буруугүй болчихоод байсан Н.Энхбаярыг,шинээр хууль гарган яллаж сонгогдох эрхийг нь хаслаа. Хуулийн уг сурвалж нь Үндсэн хууль байхаа больж том дарга нарын хүсэл зоригболж байгаа нь энэ.

З.Энхболд,Л.Оюун-Эрдэнэ нарын том дарга нарыг егөөдөн шүүмжилсэн миний нийтлэлүүдийг хэвлэхээсээ татгалзсан “Өдрийн сонин”, ёс зүй энэ тэр гэж намайг буруушааж байгаа нь “ичсэн хүн хүн ална” гээчийн үлгэр луугаа адил буюу. Үнэндээ “Өдрийн сонин”, шүүх эрх мэдлийг гартаа атгасан ҮАБЗ-ын гишүүдээс айж байгаа юм.Ардчиллын нэг хүчирхэг хоточ нохойн ноён нуруу хугарч байна! Энэ бол аюул!

Жич: ”Хоточ нохой” гэдэг бол “Өдрийн сонин”-г доромжлон гутааж буй хэрэг биш шүү!

​“Өдрийн сонин”-ы ноён нуруу хугарч байна! Аюул!

Сэтгэгдэл (0)

“Өдрийн сонин”-ы ноён нуруу хугарч байна! Аюул!