Ерөнхийлөгчийн төлөө хоёр нам өнгөндөө тэмцэлдэж буй харагдавч угтаа Х.Баттулга, У.Хүрэлсүх хоёрын зодоон гээд саначих. Энэ хоёрын алийг ч би дэмжихгүй. Яагаад гэх баримт хоёуланд нь зөндөөн буй. Би залхталаа бичсэн. Х.Баттулга: идэж уусан, гадны ашиг сонирхлыг дэмжиж мега төслүүд гацаасан, түүний үрэн таран хийсэн хөрөнгө хэдэн тэрбум доллароор яригдана. У.Хүрэлсүх: засгийн эрх булаасан, ждүчдээр хүрээлүүлж, түрэмгий бүдүүлэг авираар хууль гишиглэсэн, хоёул тус тусынхаа намын боловсролтой ахмад лидерүүдээ шоронд хадсан. Энэ хоёрын нэг Ерөнхийлөгч болбол бүр оодорно. Тиймээс хоёуланг зайлуулаад хоёр нам шинэ хүн дэвшүүлээд өрсөлдүүл. Мунгинасан эх орноо өөд татах лидер хоёр намд бий. Эх оронч сэтгэл, мэдлэг боловсрол, ёс зүйгээр Х.Баттулга, У.Хүрэлсүх нам дотроо их доогуур дугаарлагдах хоёр. Харин яагаад жанжилж чадсан нь хачирхалтай.

У.Хүрэлсүх хуулийн цоорхой ашиглаад Х.Баттулгыг нэр дэвшүүлэхгүй болгож дөнгөв. Хуулинд гажуудал байсныг арилгасан нь зөв. Одоо Х.Баттулгын хариу барих ээлж. Хуулинд бүдрэх байтугай унах нүгэл У.Хүрэлсүхэд бишгүй бий. Та хоёрын тэмцэл ялагчгүй төгсвөл та хоёрын хожмын ланчиг багасахаас гадна ард олон-маниуст сэхэх горьдлого айсуй. Та хоёрын хэн нь ч дийлэхгүй шувтарвал та хоёрын намд, улсад, цаашилбал хүн амд өөдлөх боломж гарна. Та хоёрын аминцар сөргөлдөөний нэг тал З.Энхболд, Л.Болд, Н.Алтанхуяг, Д.Бямбасүрэн, Р.Гончигдоржоос эхлээд нүүрээ нуудаг троллууд, нөгөө тал Л.Оюун-Эрдэнэ, Х.Нямбаатар, Т.Аюурсайхан болон араас нь шордон хожигч Ц.Нямдорж нар шүү дээ. Эрх мэдэлд шунагч та хоёрын тэмцэл ард олонд нэмэргүй. Улстөрийн явцуу зодоон чинь нам дотроо супер дэвжээндээ дуусвал олонд хал балгүйсан. 

У.Хүрэлсүхийн троллыг чи дүрвэл чамайг Х.Баттулгын тролл зөрүүлээд бүлнэ. Хоёул үхвэл эх орныхоо төлөө амиа зольсон баатар гэгдэхгүй. Нэг нь хулгайчийн төлөө, нөгөө нь хулигааны төлөө бие биеэ алсан хоёр мунхаг гээд хэн ч тоохгүй. Ер нь уулын цаанаас “хош” гэдэг нүүрээ нуугчид, иргэний дайны эрсдэл тулгарвал өмдөндөө харвах амьтад. “Түрүүчийн цус түрий дүүрлээ. Намайг амьд дээр намын батлах салгаад аль” гэх дайны эхний буун дуунаар түрийгээ дүүртэл чацга алдсан онигоог 1940-өөд оны монголчууд зохиосон нь одоогийн нүүрээ нуугч эх орончдод таарч буй. Тиймээс троллуудын хараалаар иргэний дайн гарахгүй. Монголчууд хэдий харанхуй ч гэлээ очиж очиж тэр хоёрын төлөө тэгж тэнэгтэхгүй. Гэвч сонгуулийн синдромоор боохой дагасан хэрээнүүд гуагалж л таарна.

Монголчууд МАН, АН-тайгаа хамтарч хуулийн зөрчилгүй сонгууль явуулаад, эрүүл ухаантай нэгнийг Ерөнхийлөгчид залаад ковидоо давж, эдийн засгаа сэргээх биз. Сонгогч-олон минь, гол хоёр намын гишүүд минь тийм өчүүхэн хоёр амьтны төлөө зодолдвол шившиг. Арсалдсан хоёр чонын аль нь дийлэх ялгаагүйг-хонь л мэддэггүй байх. Хүн бол мэднэ. Сонгогч та хонь уу хүн үү? Эцсийн гуйлт АН, МАН хоёр тараа таниулсан хоёроосоо өөр цэвэр хүн даруй дэвшүүлээч. 3-4 намын нэр дэвшигчдээс арай өргөн сонголт хийе.

2021-04-21