Өнгөрөгч долоо хоногт МУГЖ Н.Онон, Бооёо (Н.Ариунболд) хоёр хошин урлагийнхныг “алиа салбадай” гэж хэлсэн ХЗДХЯ-ны төрийн нарийн бичгийн дарга П.Сайнзоригийн эсрэг гомдол гаргаж, албан тушаалаас нь огцруулахыг шаардан яамных нь үүдэнд жагсаал зохион байгуулсан билээ. Энэ өдөр Сүхбаатарын талбайд “Үнийн өсөлтийн эсрэг” зохион байгуулж байсан залуучуудын жагсаал Н.Онон гавьяатаас болж үзэгчгүй болсон (бүх хэвлэл мэдээллүүд гавьяатын аманд микрофон барихаар очсон) төдийгүй О.Онон, Бооёо хоёр яагаад гомдсон нь ойлгомжгүй байлаа.

“Залуучуудын жагсаалыг тараах, олны анхаарлыг өөр зүгт хандуулахын тулд эрх баригчдын хийж буй ажил, хошин шогийнхны ээлжит гараа” энэ тэр гэгдэж байсан нь сүүлдээ МАН-ын эсрэг жагсаал шахуу юм болсон билээ. Хоёрхон жилийн өмнө “31 жилийн хөдөлмөрийг минь төр үнэллээ” хэмээн баярлаж байсан (ямар гомдсондоо л хэлэв гэж үү) гавьяат маань “Тэр гавьяа шагналыг чинь би гуйж аваагүй шүү. Наад үгээ намынхаа удирдлагуудад очиж хэл” хэмээн бухимдсан. 2020 оны УИХ-ын сонгуулиар манай хошин шогийнхон тэр чигээрээ МАН-д зарагдаж, “Оюун-Эрдэнэ гэдэг хүү болбоос” хэмээн хөдөө нутагт гэрийн гадаа цайлж суусан сонгуулийн үеийн бичлэг (сурталчилгаа) нь хүртэл нийгмийн сүлжээнд эргэн татагдсан байдаг юм. Тэрнийх нь хариу МУГЖ цол байсан юм дагуу.

Гэвч үүгээр тухайн үед нийгмийн сүлжээнд нэлээд том хэлэлцүүлэг болж байсан Ерөнхий сайд Л.Оюун-Эрдэнийн ХБНГУ-д айлчлахдаа зүүж явсан 23000 долларын (23,228) үнэтэй ROLEX фирмийн цагаан алтан цагны (монгол төгрөгөөр 80 сая орчим төгрөг) асуудал дарагдаж, харин Н.Онон гавьяат анхаарлын төвд орж ирсэн билээ. Тэгэхээр огтоос санамсаргүй хэрэг биш байсан шиг байгаа юм. П.Сайнзориг даргын жиргээ ч, Н.Онон гавьяатын жагсаал ч тэр. Түүнээс биш манай хошин шогийнхон бол тэрнээс цаадахийг нь туулаад ирсэн улс л даа.

Ер нь бол манай төрийн томчууд тэр цаг байтугай үнэтэй зүйл эдэлж хэрэглэдэг. Тэрийг нь хэний ямар мөнгөөр авсан барьсан гэж асууж сурагладаг, тэр нь хашиж байгаа ажил, албан тушаалд нь зохимжтой эсэх талаар санаа тавьдаг соёл манайханд бараг байхгүй. Харин энэ удаад манай Ерөнхий сайдын зүүсэн цаганд Германы хэвлэлүүд түрүүлж анхаарлаа хандуулсан нь жаахан асуудлыг томруулсан байх. Хоёрдугаарт, сүүлийн үед нүүрлэж байгаа эдийн засгийн хямрал, иргэдийн амьжиргааны доройтол ч бас нэрмээс болсон биз. Энэ мэт асуудлаас болоод “Ядуу улсын баян Ерөнхий сайд” гэгдээд нийгмийн сүлжээгээр сэвэгдээд явчихсан. Өчигдөр мэдээгээр “Нийт хүн амын 40 гаруй хувь нь ядуурлын түвшинд орсон” гэж мэдээлж байна лээ.

Тийм болохоор манай төрийн өндөрлөгүүд, УИХ, Засгийн газрын гишүүд ядаж л албан айлчлалаар гадагшаа явахдаа өмсгөл, зүүсгэлдээ зохих ёсоор анхаарал тавих ёстойг Ерөнхий сайдын сүүлд хийсэн айлчлал харууллаа. Тэгэхгүй бол бид чинь бусдын нүдэнд бид арай л “өвөрмөц” харагддаг бололтой юм. Хамгийн наад зах нь хандивлагчдаас зээлсэн, туслуулсан тэр их мөнгө хаашаа ороод байна вэ? гэдэгт цаадуул чинь маниасаа илүү няхуур ханддаг бололтой юм байна шүү.

inews.mn