Ерөнхий сайд асан С.Баяр Монгол Ардын Намд “нөлөөтэй” байхаасаа “залхаж” эхэлсэн бололтой гэтэл үгүй юм аа. Ёсолж авсан ажлаа хийхгүй энд л байх түүнд жаргалтай бол яах гэж Элчин сайдын ажлыг хүлээж авсан юм бол оо.  Ерөнхий сайдыг тодруулах Бага хурал хуралдахаас хоёр хоногийн өмнө 1990 оноос хойшхи үе, үеийн намын дарга нартайгаа уулзжээ. Уулзах саналыг Б.Даш-Ёндон гаргаж Н.Багабанди, С.Батболд, Ө.Энхтүвшин нар С.Баяртай намынхаа хагарсан алдааг засуулах зөвлөгөө авсан юм даг уу даа. Харин С.Баярын хувьд “хуулиа хар, санаачилгаа гартаа авч чадахгүй болох өдрүүд ч ирж мэдэхээр хууль шүү” гэж анхааруулсан гэнэ. Өөр нэг эх сурважлжийн мэдээлснээр бол яг ийм зөвлөгөөг У.Хүрэлсүх тэргүүтэн мөн л С.Баяраас авахад “Би та нарын хутгасан бантанг цэвэрлэж чадахгүй. У.Хүрэлсүх Таныг би энэ парламентад нэр дэвш гээд байхад дэвшээгүй. Одоо гаднаас нь Ерөнхий сайд хийх цаг ирэхэд тэр үед намайг ямар нүүдэл хийх гээд боломж санал болгож байсныг ойлгов уу” хэмээсэн байна.

Элчин сайд С.Баярын хувьд одоо ч эх орондоо байгаа бөгөөд магадгүй У.Хүрэлсүхийн Засгийн газар гэгчийг “зохион байгуулчихаад” буцах болов уу гэсэн таамаглал дэвшүүлэх болов. Ямартай ч У.Хүрэлсүхэд Бага хурлын дийлэнх нь санал өгсний “нууц” нь У.Хүрэлсүх мундагтаа ч биш, Ө.Энхтүвшинг дэвшүүлэхэд бүлэг дээр, эсвэл УИХ дээр дэмжигдэхгүй байх магадлалтай. Энэ тохиолдолд УИХ Үндсэн хуульд заасан хугацаанд Засгийн газраа байгуулж чадаагүй гэсэн үндэслэлээр тарах, эсвээс Ерөнхийлөгч Ерөнхий сайдын нэрийг санал болгох гэсэн эвгүй хувилбар руу урсан орох байсныг С.Баяр эртнээс харсан  аж.

Үндсэн хуулийн 33 дугаар зүйлийн 33.2 дахь хэсэгт зааснаар “хэрэв хамгийн олон суудал авсан нам, эвсэл бусад нам, эвсэлтэй зөвшилцөж Ерөнхий сайдад нэр дэвшүүлж чадаагүй бол Улсын Их Хуралд суудал авсан нам, эвсэл зөвшилцөн олонхиороо нэр дэвшүүлсэн хүнийг Ерөнхий сайдаар томилох саналыг тав хоногийн дотор Улсын Их Хуралд оруулах” эрх Ерөнхийлөгчид буй.

Мөн Үндсэн хуулийн 39 дүгээр зүйлийн 2 дахь хэсэгт “Монгол Улсын Ерөнхий сайд Засгийн газрын бүтэц, бүрэлдэхүүн, түүнд өөрчлөлт оруулах саналаа Ерөнхийлөгчтэй зөвшилцөн Улсын Их Хуралд өргөн мэдүүлнэ. Ерөнхий сайд уул асуудлыг Ерөнхийлөгчтэй долоо хоногийн дотор зөвшилцөж чадаагүй бол Улсын Их Хуралд өөрөө өргөн мэдүүлнэ” гэж заажээ. Тэгэхээр “найдвартай” дэмжигдэх хийгээд Ерөнхийлөгчийн эсэргүүцэлгүй дэмжих хүн нь У.Хүрэлсүх байж, түүнийгээ “эв нэгдэлтэйгээр” батлаж авахгүй бол санаачилга дээшээ нисчих гээд байж.

Ийм учраас МАН-ын Бага хурлын гишүүд хүссэн, хүсээгүй У.Хүрэлсүх рүү “ханарахаас” аргагүй байдалд оржээ. Түүнд “дургүй” гишүүн олон байсан ч Элчин сайд С.Баяр үүргээ сайн гүйцэтгэн гүнээ ухамсарлуулж түүнийг “сонгуулав”.

Өнөөдөр УИХ-ын дарга, МАН-ын дарга М.Энхболд Ерөнхий сайдад нэр дэвшигч У.Хүрэлсүхийн нэрийг Ерөнхийлөгчид өргөн барилаа. Өнгөрсөн гурван сарын хугацаанд болсон үйл явдлууд болон Ерөнхийлөгчийн зөвлөхүүд, ойр дотны хүмүүсийн үнэлэмжээр бол ёстой л “хүсэмжит кандидат”-аа хүлээн авсан байх. Тиймээс ч У.Хүрэлсүхийг Ерөнхий сайдаар томилохоос татгалзах зүйлгүй, бүр яаралтайгаар хэлэлцэн шийдвэрлэнэ үү” гэсэн хариуг өдөрт нь ирүүлчихдэг байгаа. Их яарсан байгаа биз. Харин үүнээс цааших “бодлогын өр төлбөр” нь хэрхэн хийгдэж, үр дүнд нь үндэсний эрх ашиг хангагдаж чадах эсэх нь л олон нийтэд чухал.

Ямартай ч эрлийз морь, эрлийз хүн хоёр энэ улсад багтахааргүй боллоо. Гэвч АН-ынхан “ан дуусаагүй” гэдгийг албан бус эх сурвалжуудаараа буюу сошиалаар зар түгээсээр байгаа. Энэ “бай” нь УИХ-ын дарга, МАН-ын дарга М.Энхболд юм болов уу даа. Уг нь одоогийн байдлаар дээрх “учиртай гурван толгой”-г харахад Үндэсний аюулгүй байдлын зөвлөл нэг цонхоор харах багийг бүрдүүлчихсэн мэт. Гэвч  үнэхээр “ан дуусаагүй” бол эрх ашиг нь зөрчигдсөн, эсвэл сэтгэл хангалуун бус үлдсэн “MCS”-ийн “МАНАН”-гийнхан байж болох юм. Тэд ч бас гадаад хүчин рүү даллаж эдийн засгаар дэнчин тавьж улс төрийн хонжоо олж чадна. Тэгэхээр “эх орончид эрх баригч” болсноор эдийн засгаа хэрхэн аварч чаддагийг одоо л харцгаая! Харин С.Баяр Та намдаа зөвлөж дууссан бол бушуухан очиж ажлаа хийх хэрэгтэй. Элчин сайдаар зохион байгуулуулдаг тийм хүчтэй, үнэтэй Засгийн газар байж болно гэж үү!

С.Баяр дарга аа. Баярлалаа. Баяртай. Эсвэл гүйгүүл морь шиг эргэж давхиад байхаар ажлаа өгчихөөд хүрээд ир.