Дөрөвдүгээр сарын нэгэн инээдмийн өдөр байлаа. Инээдмээр  “мөр”-өө гаргасан сар наргиантай зүйлсээр дүүрэн  өрнөв.

Бидний мэдэх “Олныг баясуулагч” хэмээх чимэг бөхчүүдийн хүрээнээс хальж, МАН-д шилжив.  Өвөг дээдэс маань “Дан дээлтэй гарсан юмсан даараа л болов уу, яагаа бол” сануулсаар байтал “давхар дээл тайлуулах” цуглаан хийж олон амьтныг хөгжөөв, буян болог хөөрхий!

Ер нь юмыг шилжсэн утгаар нь ярихаа болихгүй бол цаадуул чинь хүний өөрийн хоёрыг нүүр хийх газаргүй болгож мэдэхээр байна. МАН-ынхан мааньүнэхээр л “төрийн албан хаагчид тэрлэг давхарлаж өмсөөд бүтэж үхэнгээ алдан сууж байдаг” гэж бодсон бололтой.Ингээд дарга нар хувцсаа нимгэлэхийг бэлгэдэн зарим нэг хаалттай бааранд болдог үзүүлбэрийг төв талбай дээр хийлээ. Цаашдаа Чингисийн талбай руу орох зам дээр “18+” гэсэн анхааруулга хадахгүй бол тэнд юу ч харуулж мэдэх нь байна. Хэрвээ парламентын гишүүд сайдын албыг давхар хашиж буйг “давхар дотоож, лээвчигээ тайлах” гэхчлэн томъёолсон бол талбай дээр нүд халтирмаар юм болох байж. Гэхдээ цуглаан нь олон түмэнд инээд хөөр бэлэглэсэн сайхан үйл явдал болж өнгөрлөө, МАН-ыг дандаа харлуулаад байж болохгүй.

Монголчууд тансаг хэрэглээнд дуртай учраас эсэргүүцэл илэрхийлэх хэлбэрүүд ч үнэ цэнэтэй болсоор байна. Жагсаал нь сэтгэл татам шоу үзүүлбэртэй, тоглолттой, уран сайхны удирдагчтай болоод зогсохгүй, суулт нь дивантай, сандалтай өрнөх болов.

Ирэх сард  зөвхөн Луй Виттон  брэндийн лоозон, самбар барьсан, Bang&Olufson-ы цагаан хоолойтой, ядуурлын эсрэг люкс зэрэглэлийн тансаг жагсаал болох ба 100 долларын такстөлж оролцох аж. Цуглааны үеэр топ моделиуд “Дан дээл тайлах” эсэргүүцлийн үзүүлбэр толилуулж, ерөнхий сайдаа огцрохыг шаардана гэх.

Сарын эхний 10 хоногт Улаанбаатар хотын замыг “засна”, “засахгүй”, “оронд нь хурга засна” гэхчлэнгийн маргаан өрнөж байснаа чимээ алдав.Сарын нэгдүгээр долоо хоногт хогийн ногоон уутанд дайн зарлав. Эрэлт нь нийлүүлэлтийг бий болгодог зах зээлийн хуулийн дагуу уут нь өөрөө хогны  нийлүүлэлт үүсгэж байгаа нь судалгаагаар тогтоогдсон аж. Түүнчлэн экологийн агуулгатай ногоон өнгийг очиж очиж хогын уутан дээр буулгасан нь байгаль орчноо гэсэн иргэдийн сэтгэл рүү ус цацсан явдал болсон гэх хүн ч таарав. Хотын ариун цэврийн салбарын ажил алхам алхмаар ахиж байгаа бөгөөд хогийн уутыг устгасны дараа хогтой өөртэй нь тэмцэж эхлэхийг үгүйсгэхгүй байна.



Сарын дунд арав хоногт судлаачид олон олон шинэ дүгнэлтэд хүрсний дотор, мал байгаа явдал нь малын хулгай гарах сэдэл-нөхцөл болдог гэдгийг тогтоосон явдал ч орж байна.Учир иймд хулгайч хулгайлуулагч хоёрыг хам хэрэгтэн гэж үзэх нь тодорхой болж байгаа ба шийтгэлийг эдлүүлэхдээ малыг хүнтэй нь шоронд хорих уу, эсрэгээр нь хүнээ малтай хашихбайдлаар шийдэх үү гэдэг дээр маргаантай байна. Харин сарын сүүлийн 10 хоногт нийслэлийн жагсаал цуглаан олон жилийн дундажийн орчим байна гэсэн прогноз гарчээ.

Бас цагдаагийн шинэ хувцас зохисон эсэх тухай “Үндэсний анхдугаар маргаан” амжилттай өрнөлөө.  Орон даяар “хувцас нь хөөрхөн”, “үгүй ээ, цагдаа нь хөөрхөн” гэхчлэнгийн өргөн хэлэлцүүлэг өрнөсний дотор “хувцасгүйдээ ч (ялангуяа бүсгүйчүүл нь)хөөрхөн” гэсэн санал ихээхэн дэмжлэг авч байв.

Хууль зүйн сайд Тэмүүжинг “сарын муу хүн” болгох ажил өрнөж байна. Тэмүүжин муу байгаа гэхээсээ илүү Тэмүүжингийн хийсэн хууль зүйн салбарын шинэтгэл олон хүнд муу болсноос үүдсэн хэрэг болов уу?

Ер нь тохох хүн л олддог юм бол хэрэг ч мундахаа байсан цаг аж.Зурагтаар гүйдэг зар дотор “ Эзэнгүй (хуучин байж болно) хэрэг худалдаж авна.МАХН-ын байр, эсрэг талын өрөөнийБасанхүүг дуудуулж ярих” гэсэн бичиг явж байсан ч гэх шиг.

Сайд Тэмүүжингийн олон хэрэг илэрсний дотор “1170 оны хавар Хэнтий аймгийн харъяат, эрхэлсэн тодорхой ажилгүйЕ.Бэгтэр гэгчийг харваж алсан”явдал ч байгаа гэх. Уг хэргийг дүү Хасартай бүлэглэн үйлдсэн ч байж магад бөгөөд нотлогдвол байдал бүр ч хүндрэнэ гэнэ. Түүнчлэн “Орондоо хууль бодсон”, “Хятадад айлчилж байхдаа огиж үндэсний бөөлжисний алтан фондод мэдэгдэхүйц хохирол учруулсан”асуудал нь ч сөхөгдөж байгаа дуулдав. Түүний холбогдсон  олон хэргээс “Саж ламын хэрэг”, “Малаа нийгэмчлэхээс зайлсхийсэн асуудал”, “Эхнэртэйгээ дотно харилцаа тогтоосон зөрчил”...зэргийг дурьдснаар энэ хэсгээ өндөрлөе.

Ер нь фельетоноо  ч сайхан мэдээгээр өндөрлөнө өө. Дөрвөн сар гарснаас хойш нийслэлийн хэмжээгээр борооны дуслаас өөр юм тэнгэрээс унаагүй, түүнд өртөгсөд огтхон ч гэмтээгүй зэрэг нь бидний баяр дээр баяр нэмж байгааг тэмдэглэсү.