90/10 –ын дүрэм

Энгийн дүрэм. Дэлхийн бүх мөнгөний 90 хувийг дэлхийн нийт хүмүүсийн 10 хувь нь эзэмшдэг. Зөвхөн мөнгө ч гэлтгүй олон юман дээр 90/10 –ын дүрэм бий. Хөлбөмбөгийн бүх цомын 90 хувийг нийт багуудын 10 –хан хувь авдаг, нийт хүүхнүүдийн 90 хувь нь нийт эрчүүдийн 10 хувьтай унтдаг, нийт хөвгүүдийн 90 хувь нь нийт охидын 10 хувьд л сэтгэл алдардаг, нийт саналын 90 хувийг нийт нэр дэвшигчидийн 10 хувь л авдаг гэх мэт, гэх мэт.

Хүссэн ч эс хүссэн ч хүмүүсийн тавилан тэгш бус. Гар хүрэхээс ч цэрвэж хайрладаг бүсгүй нь өөр нэг эрийн хоногийн зугаа болох нь бий. Насаараа хураасан хэдэн төгрөг нь баян Арабын цамцны үнэтэй ч байж магад. Хайртай багийнх нь лидер тоглогч дургүй багийнх нь сэлгээнд сууж ч болно. Гэлээ гээд бурхан зовлон жаргал гэгчийг ялгаваргүй заяасан гэж л итгэхийг хүснэм. Зарим хүний хувьд энэхүү ялгавартай байдлыг ерөөс үзэж чадахгүй нь мэдээж. Тиймдээ ч бүгдийг эрх тэгш сайхан жаргуулах үүднээс нь Коммунизм буюу Монгол хэлнээ “Эв хамт ёс” хэмээдэг диваажинг бүтээхийг зорьсон биз.

“Wall Street –ийг эзэл” хөдөлгөөн баруунд хүчээ авлаа. Өчүүхэн хэсэг нь цулайж, ард олноороо ядуурч буй хэмээн олон хүн хилэгнэж буй. Ер нь эдийн засаг, санхүүгийн хүндрэлүүд тохиолдох бүрт “Энэ нийгэм болохоо байлаа” хэмээн либерал үзлийг өөлж, социалист шударга ёсыг зөвтгөгчидийн дуу өндөрсдөг нь гарцаагүй үзэгдэл. 30 –аад оны хямрал, 70 –аад оны хямралын үеэр ч Ардчиллын өлгий орнуудад социалист чиг хандлагатай улс төрч, “одууд” олноороо гарч ирсэн. Одоо ч бас нөхцөл байдлын талаар мундаг тоймчид, судлаачид өөр өөрсдийн дүгнэлтээ хийсээр л байгаа, цаг хугацаа хариулах биз.