Хүний мах цусанд хүртэл шингэчихдэг юм уу гэмээр айхтар хатуу үзэл суртал бидний дунд байсаар л байна. Өнөөдөр Монголын төр, засгийн эрхийг барьж байгаа МАН коммунизмын үед "Америкийн империализм ба түүнтэй эрэлхэг цогтой тэмцсээр" ирсэн уламжлалтай. Одоо ч хэвээрээ энэ үзэл дээрээ бат зогссоор л байх юм. Хуучин бол Зөвлөлт болон социалист системдээ үнэнчээ илэрхийлэхийн тулд хүсээгүй үгээ хэлж гээд уучлахсан.

Энэ намд одоо "Америкийг зүхэх" явдал яагаад тийм чухал байгаа юм бол. Эдний үеийн үед занаж нулимдаг байсан одоо ч айлгасаар байгаа АНУ бидэнд яг ямар гай хөө болсон юм. Дэлхийн ихэнх хүмүүс эрх чөлөөний энэ оронд очиж үзэх, улмаар амьдрах амьдын мөрөөдөл болцгоодог. Ху намын дарга нарын хүүхдүүд бараг бүгд тэнд очоод төвхнөчихсөн харагддаг. Тэгсэн мөртлөө ард түмэндээ хандаж мэдээллийн хэрэгслээр ухуулахдаа "Угаасаа АНУ-д зүүн төвийн нэг ч нам байхгүй (Коммунист чиг баримжаатай нам байхгүй нь үнэн л дээ). Дандаа хөрөнгөтний намууд нь ялдаг. Америкчууд өөрсдийгөө дэлхийн хаан гэх нь халаг болж цээжээ дэлддэг. Жижиг орнуудад өөрсдийн эрх ашгаа тулгадаг. Тэдний "Бүгд найрамдахчуудын хүрээлэн" гэгч төрийн бус байгууллага Монголын ардчиллынхантай их холбоотой байна. Цаанаа Америкийн эрх баригч улс төрийн намтай нягт холбоотой энэ байгууллага Монголд 1993 оноос хойш АН-тай сүлбэлдээд байна шүү. Бүр 1930-аад оноос дэлхийн буурай орнуудад үйл ажиллагаагаа явуулж эхэлсэн "Ардчиллын төлөөх сан" гэгч байгууллага манайх руу өнгөлзөх болсон нь "Яавч муу ёр". Тэд Арабад хувьсгал хийсэн. Одоо Оросыг минь самарч ч магадгүй. Өнгөрсөн сонгуулиар болсон үймээн самууныг эргэж нэг санацгаая. Арай юу яасан юм биш байгаа. Бид ийм л нэг аюулын харанга дэлдсэн цаг үед амьдарч явна даа. Батлан хамгаалах яамны сайд маань санаа зовж цэрэг цуухаа бэлэн байдалд оруулах гэтэл АН-ынхан огцруулах гэлээ. Энэ бол харийн хар пиарчдын нөлөө мөнөөсөө мөн. Харь газрын Америкийн империалистуудын нөлөө орж ирэх нь туйлын аюултай..." гэхчлэн бичүүлдэг боллоо.

Зөвлөлтүүдийн Монголд байгуулсан энэхүү коммунист нам үүссэн цагаасаа хойш ерэн жилийн турш нэгэн дайсны эрэлд хатсан байдаг. Тэр нь империализм буюу Америкаас учирч болшгүй аюул. Ардын нам биднийгээ энэ "муу ёр"-оос олон жил хамгааллаа даа. Богд хаант Монголын төрд алба хашиж байсан манай өмнөх үеийн улс төрийн зүтгэлтнүүд "Монгол Улсын гадаад бодлого хоёр хөршөөсөө цаашхи тусмаа бидэнд ашигтай. Гуравдагч орны эрх ашиг манай оронд зохих хэмжээгээр суурьшвал бүл муутай биднүүс хөрш орондоо уусалгүй тусгаар үлдэх нөхцөл давхар хангагдана. Улмаар бид томчуулын зодооны талбараас ангижирч төвийг сахьсан улс болж элдэв дажингүй амар жимэр амьдрах нь чухал" гэж үздэг байсан. Энэ үзлийг Ардын нам, Ардын засаг цаазалж улмаар Чингэсийн алтан ургийнхныг бүртгэж аваад хядсан билээ.

1990 оноос өмнөх манай бүх л мэдээллийн хэрэгслийн бичдэг гол сэдэв нь Америкийн аюул гэгч байлаа.

"Америк цэрэг чи сонсож бай

Ахиад хэлж байна сонс чи

Мохошгүй зоригт Вьетнамыг

Монгол түмэн өмөөрч байна...Бузар империалистууд савраа тат..." гэх мэтээр байнга бичих ба тэдний төрийн тэргүүн нь аль нэг оронд айлчлахыг нь хүртэл хэлэх муу үгээ олж ядан "доншуучиллаа" гэдэг байж билээ. Хэрэв өс санадаг хүнсэн бол ерэн онд оросууд биднийг хаяад явчихсан сиймхийгээр орж ирээд ял асууж будаа болгохгүй юу.

Ардчилсан нийгэм төгс төгөлдөр биш ч коммунизмын өрөөсөн дугуй биш. Ардын намын үзэл сурталчид Америк тогтолцоог "Яавч сайны ёр биш" гэж гэжээ. Тийм аймаар байсан юм бол өөрсдөө Америкт очиж боловсрол эзэмшихгүй, Америкт үр хүүхэд гэр орноо аваачихгүй байх чинь яасан юм. Битгий тэгж ард түмэндээ худлаа ярьж байгаач.

Нийгмийг хагаралдуулан буталж танай манай нам болгоно. Одоо бүр хууч өвчин нь сэдрээд улс гүрнүүдийг нөхөр дайснаар нь ялгаж эхэллээ. Том гүрнүүдтэй олон талт тэнцүү бодлого барьсны хариуд өөрийн орны ардчилал, тусгаар тогтнолоо баталгаажуулж байгаа хэмээн боддог. Эсвэл ардчилсан чиг баримжаатай олон улсын байгууллагууд манай Ардын намд муугаа байг гэхэд сайнгүй ханддаг юм болов уу. Тийм бол ч урьдын адил ийнхүү зүхэж занах нь аргагүй байх л даа. Геополитикийн байршлын хувьд бид алх хадуурт далбаа бүхий асар том коммунист болон тоталитар дэглэмийн дунд хүний эрх чөлөөг дээдэлсэн нийгэм байгуулахаар зүтгэж яваа орон. Өөрөөр хэлбэл, бид хөрш орнуудаасаа нийгмийн өөр зам сонгоод хорь гаран жил өнгөрчээ. Тэглээ гээд сонгосон замаасаа болж мөнхийн хөршөө гомдоох алхмыг ардчилсан хүчнийхэн хийгээгүй. Орос, Хятад хоёрын дунд нэг ардчилсан орон байх нь дэлхий дахинд муухай харагдаагүй. Энэ нь Америк тэргүүтэй ардчилсан орнуудын сонирхлыг татаж байгаа болохоос биднийг гүрэн давж нисч ирээд нэмж хүчиндэх гээгүй байлгүй дээ.

АНУ-ын засгийн эрхийг барьж байгаа хамгийн том хоёр намын нэг "Бүгд Найрамдахчууд" Монголд Ардчилсан намынхантай нийлээд манай улсад хорлон сүйтгэх ажиллагаа явуулах гэж байна гэж Ардын нам бичиж байна. Америкчууд ядуу буурай орнуудыг дандаа ингэж нөлөөндөө оруулдаг гэжээ. Ингэхэд бид хорлуулж сүйтгүүлж байхдаа таарсан ямар гээч нүгэл хилэнц хийгээд яваа билээ. Цөмийн зэвсэг туршиж, террор хийн, байн байн төрийн эргэлт гараад л, шашин, үндэстэн хоорондын тэмцэл өрнөөд ер зүгээр байдаггүй бол түүгээр нь далимдуулна гэхсэн.

Улс оронд учирч болзошгүй аюул байлаа гэхэд хаа байсан дэлхийн нөгөө бөөрөнд буй тивийн цэрэг танк Монголын хаагуур цөмрөн орж ирэх нь сонирхолтой. Асуудал иймдээ тултлаа ноцтой байдалд ороод байгаа юм биш л дээ. МАН сонгууль дөхөхөөр ингээд балайрдаг болчихоод байгаа юм. Сонгогчдыг өөртөө татахын тулд өөр юу ч гэхээс буцахгүй хамаагаа алдаж байна. Хамгийн хорлонтой нь манай эрх барьж байгаа улс төрийн хүчин маань гадаад ертөнцөд ийм овлигогүй байр суурь баримтлан цохиж яваа харагдах нь харамсалтай. Эрхбиш энэ сонгуулиар цаг нь ирж улс төрөөс бууцгаах байгаа л гэж найдахаас. Дараа нь сөрөг хүчин болцгоогоод гудамжинд гарч юугаа хэлж яаж өвчигнөх нь тэдний эрхийн асуудал. Америкийн аюул гэж америкчууд өөрсдөө ч хэлж л явцгаадаг.

Энэ бүгдийг сонгуулийн дараа улс төр хийж байсан юм гээд уучилчихдаг юм билээ. Улс төрөө гэж. Ард түмнээ дандаа нийгмээс нэг алхам ургаш биш аргаш яваа хэмээн тооцоолж мангар мангар юм яриад байвал илүү "очков" авдаг хэмээн туршлагаасаа ярьж байна. Бүх үнэнээ хүлээчихвэл саналаа хэн МАН-д өгөх юм гэж байна. Нээрэн ч тийм байх даа.

МАН аль ч үед Америкийг зүхдэг. Одоо ч хэвээрээ

Сэтгэгдэл (0)