Орон сууцны өндөр өндөр барилгууд баригдаж  мань мэт тохилог орон сууцанд хямдхан үнээр орж, нийслэл хот маань гэр хороолол гэдэг ил задгай жорлон, хогийн цэг, нүүрсний утаанаас салах цаг холгүй гэж итгэж явсан юмсан. Сүхбаатар дүүрэгт VII хороолол баригдахаар бэлтгэл ажил хийгдэж инженерийн шугам сүлжээгээ татаж, хашааны айлуудын газрыг 30-40 сая төгрөгөөр худалдаж аваад энэ бүтээн байгуулалтын ажил овоо урагшилж байв. Манай сонин ч дэмжин айлуудыг  албадан нүүлгэх ажилд идэвхитэй оролцож байлаа. Сүхбаатар дүүргийн Зуун айлын орчим  хашаанд амьдардаг зөрүүд дөрвөн хөгшин, машин  засварын нэг газар, шөнөөр архи шагладаг хэдэн ТҮЦ газраа чөлөөлж өгдөггүй тас гүрийснээр 100 мянган айлын орон сууц барих их ажил будаа боллоо. Тэр хашааны айлууд хэдэн сая төгрөг нэхсэн гэж санана. 100-150 сая төгрөг өг гээд хэвтчихдэг байгаа. Дээрээс нь нь Бат-Үүл газраа битгий өг наад газар дээрээ гурван давхар барилга бариад өөрөө ор гэж  хөөрөгдчихжээ. Улаанбаатар хот одоо гэр хорооллоосоо сална гэдэг өнгөрсөн. Бат-Үүл орон сууцны өндөр барилга барихыг эсэргүүцэж гэр хорооллын хашаа байшинг нь бохир, цэвэр усны системтэй холбож өгөх бодлого хэрэгжүүлэх гэж улайран гэр хорооллынхныг даврааж байна. Бат-Үүл өөрөө гэр хороолол хашаа байшинд амьдрахын зовлонг үзээгүй  болохоор хурдхан орон сууцанд орж ядаж хир хурнаасаа салах юмсан гэсэн гэр хорооллынхны зовлонг мэдэхгүйдээ ингэж байгаа юм. Ер нь Бат-Үүл гэр хорооллынхонд их хайртай. Гэр хорооллынхон хашааны газрыг хувьчилж өгсөн гэж Бат-Үүлээр бамбай хийж сурчихсан юм. 2002 онд Бат-Үүл бид нар газрын төлөө хөдөлгөөн байгуулж трактортой жагсаал хийхдээ анх гэр хорооллынхны газрыг хувьчлах биш тариа тарьдаг, ногоо ургадаг газрыг иргэдэд нь тэнцүү хувааж хувьчлуулах шаардлага тавьсан юм. Гэтэл нэг л өдөр Үүл хувирч, орон сууцныхан нь орон сууцаа авчихлаа. Малчид малаа авсан, гэр хорооллын хашааны газрыг хувьчилж өг гэдэг шаардлага, эрх баригчдад тавьсан юм. Бид хотод байшин барих газар олдохгүй бүүр баларна гэж эсэргүүцээд дийлээгүй. Тариалангийн газрыг хувьчлуулах зорилготой трактортой жагсаал тарахдаа гэр хорооллын газрыг өмчлүүлсэн үр дүнтэй салсан даа. Нийслэл хот маань Бат-Үүлээс болж гэр хороолол гэдэг энэ бохир заваан бүхний үүр уурхайгаас салах нь өнгөрөв бололтой. Үүл ийм л их нүгэл хийсэн хүн. Ойрдоо тэр тун ууртай байна. Уурлахаараа, дургүйгээ хүрэхээрээ коммунист, муусайн коммунистууд гэж зүхдэг юм. Үүл утсаар ярьж байна. Элбэгдорж ч, Баттулга ч Женко, чи ч коммунист болчихож. Нэг өрөө байр голлож өндөр өндөр орон сууцнууд, оюутны байр шиг обшежить барина гэж байна. Чи гэр хорооллынхныг албадан нүүлгэх хэрэгтэй гэж байна. Коммунистууд ингэдэг юм. Коммунистууд л бусдын өмчид халддаг юм. Коммунистууд л хуарангийн дэглэмийг бий болгож, хуарангийн орон сууц барьдаг юм гэж ирээд их ууртай байгаа. Үүлийг бүүр уурлуулмаар санагдаад цаашллууллаа. Үүл уурлахаараа юм бичиж тайвширч кайф авдаг. Их уншина бас нягт нямбай сайн ч бичнэ. Насаараа гэр хашаанд амьдарсан би байранд орох гэж ядаж яарч байхад, 40 мянгатад өссөн чамд ямар хамаа байна. Гэр хорооллыг албадан нүүлгэх байтугай /бөмбөгдчихсөн ч яадаг юм/ гээд утсаа  тавьчихлаа. Дахин залгаж байна. Өвгөөн чи боддоо чамд 60 жилийн хугацаатай 60 сая төгрөг өгье. Хашаанд чинь цэвэр, бохир усны систем, төвлөрсөн халаалт оруулаад өгье. Чи 60 сая төгрөгөөрөө сайхан байшин бариад сууж чадна шүү дээ гэж ятгаж байнаа. Би бас л зөрүүдэлж 60 саяар чинь ганц машин авч унаад архи уугаад ёстой галзуурч өгнө дөө гэлээ. Харин би хашаандаа хэвээрээ л амьдарна гэлээ. Үүл нэг ийм юм бодоод мөрөөдөөд байгаа хүн л дээ. Уул уурхайгаас орох орлогыг иргэдийн үндсэн хөрөнгө болгоход оруулъя. Хэрвээ үндсэн хөрөнгө болгохгүй бол гадаадын компаниудын ашиг болоод мөнгө гадагшаа урсаад байна. Тэр их ашгийг хувийн хаус, байшин болгож үл хөдлөх хөрөнгө болгоогүй цагт ард түмний амьдрал дээшлэхгүй гэж үсээ хар болтол бодоод яриад явж байгаа хүн. Үүлийнхээр бол гэр хорооллын хашааныхан өөр өөрсдөө байшингаа бариад, ногоогоо тариад амьдрах юм байх аа. Яг тэгж харагдаач. Бат-Үүл ингэж гэр хорооллынхныг давраагаад байгаа юм. Харин минийхээр нийтийн эрх ашгийн төлөө юм чинь яадгийн бэ. Хашааны газрын хувьчлалын хуулийг өөрчилж төр бүгдэд нь нэг өрөө байрны үнэ өгчихөөд л  хашаа байшинг нь бульдозердоод зайлуулчих. Төрийн бодлогоор өндөр байшингууд сүндэрлүүлээд гэр хороололынхныг оруулж бохир завааны үүр уурхайгаас салж хотоо аврах хэрэгтэй санагддаг. Үүлийн гэр хорооллынхныг давраасан нүглээс болоод гэр хороолол нүүх нь өнгөрлөө. Гэр хорооллоо нүүлгэж чадахгүй юм чинь нийслэлээ нүүлгэхээс өөр ямар ч арга байхгүй.