-фельетон-
Юу болоод өнгөрчвөө. Жагссан, чулуудсан, чулуу­дахаар нь чулуудсан, бууд­сан, буудахаар нь буудуул­сан... тэгсэн чинь  алтан медалиуд авсан... Яасан чинь яачихваа. Ойлгохоо байчлаа.
Сүүлийн үед янз бүрийн эрхээ хамгаалсан этгээдүүд толгойг маань  бүр нэмж эргүүлээд хаашаа харж бай­гаагаа ч мэдэхээ больчлоо. Саяхан нэг гаж донтой эрийг прокуророос "хүчингийн хэ­рэг"-т сэжиглэн саатуулжээ. Гэтэл нөхөд нь прокурорын газрын өмнө сүрт жагсаал хийж  "Монгол  Улсын иргэн эр хүний үүргээ биелүүлс­нийхээ төлөө хохирох ёсгүй", "Монгол төр монгол эрийнхээ эрхтнийг хамгаалъя" хэмээн  уухайлсан сүрт жагсаал хий­жээ.

Тэд "монгол харчуул эр хүнийхээ үүргийг биелүүлэх баталгаа" гаргаж өгөхийг төрөөсөө шаардаад байна.  Эцсийн дүндээ эр хүнийг эрхтэнтэй болгож төрүүлсэн албан тушаалтан л бүх ха­риуцлагыг үүрэх ёстой хэ­мээн үнэмшилтэй нь аргагүй ухуулцгааж байна.  Жагсагчид прокурорт "эр хүн яах гэж эрхтэнтэй төрдөг юм бэ"  гэсэн гүн ухааны асуулга тавин мухардуулж байгаад найзыгаа суллуулан авч яв­сан байна.

Манай Ерөнхийлөгч олим­поос анхны алтан медаль авсан тамирчиндаа хөдөл­мөрийн баатар цол олгож баярлуулах мөртлөө "Баатар шиг амьдраарай" хэмээн за­насны учрыг бас олохгүй байна. Баатар уржигдар гар­лаа гэв үү?

Хоёр дахь алт ба мөнгөн медалийн эзнийг алт авахгүй бол "эргэж ирсний хэрэггүй шүү" гэж занасан гэдгээ өөрөө зурагтаар ярилаа.  Хэрвээ тэднийг аз дайраагүй бол манай орны иргэн хоё­роор хорогдох байсан байна шүү.

 Манай Ерөнхийлөгч 1997 онд Завханд сонгуульд өр­сөл­дөж байхдаа "Би Завханы хүргэн" гэж ирээд асгаруулан чиг мэлмэрүүлээд байсан юмсан. Сая тэгэхнээ "Би  Увсын хүргэн" гэж зураг­таар ярилаа.  Авгайгаа солив уу, хадам аа шинэчлэв үү? Ха­дам нь нутгаа солив уу? Ерөнхийлөгч солигдов уу? Эсвэл аль нутгаас урлаг соёлын авьяастан төрнө, тэнд хүргэний ёсоор очиж байх гээд олон эхнэр авсан юм бол уу? Бөө мэд.

Алтан медаль гэснээс  түүнийг авч өгсөн  хүнийн тоо хэрээс хэтрээд байна.  Юуны түрүүн Ерөнхийлөгч өөрөө  ярихдаа  олимпийн дөрвөн медаль цэвэр миний зүтгэ­лээр олдсон. Би дөрвийн дөрвөн уул тахиж байж л авлаа шүү дээ гэсийм хэллээ.  Нэгэнт л тэгдэг учиртай юм бол ямар санаатай дөрөвхөн ширхэг уул тахиад больчихдог байна.  За тэгээд ховс, засал хийсэн улс маймгүй олон байна.  Нэг нөхөр тамирчдын гарын алгаар, нөгөөх нь хө­лийн тавхайгаар мэргэлээд өрсөлдөх тамирчин, ялах оноог нь барим тавим хэлж байсан болж таарав. Ингээд бодохоор ямар ч байсан   ма­най тамирчид   олимпийн алт, мөнгөн медалийг өөрснөө аваагүй  болчих гээд байна.

Цааш нь бодоод байхаар манай энэ хэн...за за Их хурал байгуулагдаад ард бид нар жаргаж байна гэсхийгээд бодохоо больсон нь дээр юм шиг байна.