Мэргэжлийн сүмогийн 68 дахь их аварга Асашёорюү гэнэт зодог тайлж байгаагаа мэдэгдэж, шүтэн бишрэгч­дийнхээ дунд санаа сэтгэлийн хүчтэй давалгаа үүсгэснээс хойш нэлээд хэдэн сар өнгөрч байна. Ирэх аравдугаар сард болох зодог тайлах ёслолдоо бэлтгэн Монгол, Японы хооронд ирж буцан буй их аварга зуны амралтаа Монгол­доо өнгөрөөхөөр шийджээ. Саяхан болсон нэгэн томоо­хон үдшийн цэнгүүнд аварга хүрэлцэн ирж, танил хүмүүс­тэйгээ мэнд мэдэн чөлөөтэй ярилцаж суусан нь мэдээл­лийн хэрэгслээр цацагдсан. Үсээ урьдын ёс төртэй хэлбэ­рээр биш, энгийн боочихсон байсан нь түүнийг илүү эрх чөлөөтэй харагдуулж байлаа.
Омголон, оргилуун, нэлэн­хүйдээ сүрлэг үзэгддэг их аварга яг энэ харагддаг шигээ зан аашийн хувьд нээлттэй, шударга хүн. Бүр цаад руу нь өнгийвөл гэрэл гэгээтэй, цагаан цайлган, мөрөөдөмтгий ертөнц цалгилж байдаг. Бас  санаа сэтгэлийн хөдөлгөөнөө хорьж цаламдаж сураагүй зоргоороо, тэгсэн хэрнээ гэгэлгэн.
Аварга маань биднийг ахин гайхашруулах зүйл хийжээ. Тэр үнэхээр бусдын зүрхийг булгилуулж байх заяатай төрсөн хүн юм. Энэ үгийг өнгөрсөн баасан гаригийн шөнө хүлээж авсан нэгэн сайхан мэдээ надаар өөрийн эрхгүй хэлүүлж байна.
Эл явдал Архангай аймгийн нутаг дэвсгэрт орших алдарт Өгийнууранд баасан гаригийн өдөр болсон аж. Амрагчид, аялагчдын хөлд үргэлж дараатай долгилж байдаг Өгийнууранд сэлэхээр их аварга ч бас  очжээ. Гэтэл гэнэт завьтай хүн живж байгаа харагдсан төдийгүй хүмүүс хашгиралдаж эхлэх нь тэр.  Их аварга ч аврахаар тэр даруй­даа ус руу орж. Аваргыг очиход завьтай хүн маш хүнд байдалд орсон байсан төдийгүй, юу юугүй доошлон живж байсан гэнэ. Ийнхүү Асашёорюү аварга усанд живж байсан нэгэн хүний амийг аварсан тухай   дуулиан тэр шөнөдөө ойр орчмоор  тархаж, аваргын тухай бахдам сайхан мэдээ айлаас айлд зочилж явна. Монголчууд аваргынхаа буянаар ирэх наадмаа ийм  гайхамшигтай яриатай угтах нь. Миний авсан мэдээллээр бол аваргын аварсан хүн нийслэлийн Хан-Уул дүүргийн цагдаагийн газ­рын ажилтан байсан бололтой. Мэдээллийн мөрөөр аваргатай холбогдох гэсэн боловч тэ­рээр гар утасны сүлжээ барь­даггүй газар байгаа бололтой.
Үргэлж буцалгаж байдаг их аварга ийнхүү бусдын зүрх сэтгэлийг булгилуулсаар явна. Түүнд уншигчдынхаа өм­нөөс сайн сайхныг хүсч, Үндэсний их баяр наадмаар бахтай сайхан наадахыг ерөөе.