Сүүлийн жилүүдэд манай зураачид өнгөтэй байх болсон. Тэд завтай, энд тэнд “эвгүй гишгэж” явахаа байсан шүү. Өрсөлдөөн ихтэй, дор бүрнээ үзэсгэлэнгээ гаргах гэдэг болсон болохоор галлерейнууд ч захиалгад дараастай байдаг болсон.  

Монголын уран зургийн ертөнцөд өөр өөрсдийн байр суурь, орон зайг хэдийнэ эзэлсэн шилдэг уран бүтээлчдийн хамтарсан үзэсгэлэн Урчуудын эвлэлийн хорооны “Арт”галлерейд гарлаа. Монгол ахуйн сэдвийг тун өвөрмөц арга, дүрслэлээр зурдгаараа ялгардаг Цэгмэд, байгалийн сэдвээр гарамгай туурвидаг Нарангэрэл, адуунд хайртай, түүгээр уран бүтээлийн онгод хийморио дуудаж явдаг, морь зурах өөр хэнд ч байдаггүй технологи, арга барилтай Батмөнх, сонгодог зургийн Лхагвасүрэн, монгол ахуйн сэдвээр голчилдог Бумандорж гээд магтуулах шалтгаантай нэгэн үеийн зураачид бүтээлүүдээ дэлгэсэн байлаа.  

Сүүлийн тав, зургаан жилд Монголын зураачдын идэвх сэргэж, бүтээлүүд нь чамгүй үнэ хүрэх ч болсон. Энэ хэрээр тэдний амьдрал өнгөлөг, цаашид бүтээн туурвих хүсэл дүүрэн, ур чадвар нь ч сайжирч байгаа билээ. “”Орон зай” хэмээн нэрийдсэн үзэсгэлэнг хамтарч гаргасаар ирсэн энэхүү уран бүтээлчид бол Дүрслэх урлагийн дээд сургуулийн багш нар юм. Тэднийг Монголын уран зургийн хөгжлийн өнөө цагийн өнгө, бүтээл туурвилын чиг хандлагыг тодорхойлогчид ч гэж хэлж болох байх.   

Эдгээр зураачийн зураг бүтээлүүд Монголын уран зураг сонирхогч, цуглуулагчид төдийгүй гадаадын цуглуулагчдын ч сан хөмрөгт хүндтэй байр эзлэх болсон тухай үзэсгэлэн зохион байгуулагчид ярьж байлаа. Шилдэг зураачид Монголын уран зургийн талбар дахь өөрсдийн орон зай, хүсэл мөрөөдлийн ертөнцдөө үзэгч олноо аялуулсандаа баяртай байлаа.

Мөн “Занаду арт” галлерейд бас нэгэн үзэсгэлэн нээгдээд байна.

Р.Оюунжаргал


Зургийн тайлбар: Б.Нямхүүгийн “Зүрхний цохилт”