2010 оны 1 дүгээр сарын 06-ны өдөр болсон Төрийн байгуулалтын байнгын хорооны хуралдааны үеэр УИХ-ын гишүүн Х.Тэмүүжин та, мөн УИХ-ын гишүүн Ц.Нямдоржийг “нохой”-той зүйрлэсэн нь бусдын нэр хүндэд ноцтойгоор халдсан явдал гэж Баянзүрх дүүргийн 14 дүгээр хорооны иргэн миний бие үзэж байна. Хэдийгээр манай хууль тогтоогчид бараг толгой дараалан “УИХ-ын гишүүн чуулганы танхимд хэлсэн үгийнхээ төлөө хариуцлага хүлээхгүй” гэсэн бамбайн ард нуугдахыг илүүд үздэг боловч шинэ гишүүн Х.Тэмүүжин таны “ичих булчирхай” одоогоор ажиллагаанаас гараагүй байгаа гэж найдаж байгаа учраас энэ зүй бус явдлынхаа төлөө надаас болон нохой тэжээдэг бүх иргэдээсээ уучлал гуйна гэдэгт итгэж байна. Миний бие Таны дээрхи үйлдэл бусдын нэр хүндэд ноцтой халдсан явдал мөн болохыг дараах үндэслэлүүдээр тайлбарлаж байна.

1. Миний гэр бүлийн үнэнч анд болох нохой болон бидний хоорондын харилцааг зохицуулдаг хууль болох командуудыг манай нохой ямагт үнэнчээр дагаж мөрдсөөр ирсэн. Зарим тохиолдолд нэг үйлдлийг хэт олон удаа давтуулсны харгайгаар команд биелүүлэхээс татгалздаг боловч тэрээр хэзээ ч энэхүү командуудыг өөрийн мунхаг хүсэлд нийцүүлэн өөрчилж, гар хүрч байгаагүй билээ.


2. Миний нохой, бүх амьдралынхаа туршид, өрхийн тэргүүн болох миний бие болон манай гэр бүлийн хүн гэсэн эрх бүхий этгээдүүдээс оноож өгсөн хоол хүнс, хувцас, хэрэглэлийн хэмжээнд өөрийн хэрэгцээгээ хязгаарласнаар ирсэн бөгөөд бусадтай үгсэн нийлэх замаар энэхүү хэрэгцээнээс илүү зүйлсийг биднээс шаардаж байгаагүй болно.


3. Цөөн тохиолдолд, зөвхөн өөрийн биеийг хамгаалах зорилгоор, хажуугаар өнгөрсөн болон дэргэд нь огцом хөдөлсөн хүн рүү хуцах (дашрамд дурдахад тэрээр нэг ч удаа бусдын биед гэмтэл учруулж байгаагүй болно) мэтээр зохисгүй үйлдэл гаргадаг боловч онц ноцтой шалтгаангүйгээр бусад руу араа шүдээ ярзалзуулан дайрах, зүй бүсээр доромжлох зэргээр ёс суртахүүнгүй байдлыг миний нохой мөн гаргаж байгаагүй гэдгийг манай хорооны иргэд гэрчилнэ.


Гэтэл эрхэм гишүүн Таны, миний үнэнч андтай зүйрлэсэн этгээд нь Монгол улсын хуулийг өөрийн дураар засах, олон удаагийн үйлдлээр, бусадтай хамсаж өөрийн эрх ашигт нийцүүлэн зарцуулах тэрбум хүртэл төгрөгийг улсын төсөвт тусгуулах, Улсын их хурлын чуулганы танхимд бусдыг хэл амаар доромжлох гэх мэт үйлдлийг удаа дараа хийж байсныг хэвлэл мэдээллийн хэрэгслээр миний бие олонтаа харж, уншиж, сонсож байсан болно.

Иймээс УИХ-ын эрхэм гишүүн Х.Тэмүүжин таныг бусдын нэр хүндийг гутаасныхаа төлөө уучлал гуйхыг өөрийн нохойны итгэмжлэгдсэн бие төлөөлөгчийн хувиар шаардаж байна. Миний энэхүү шаардлагыг хүлээн аваагүй тохиолдолд зохих хууль тогтоомжийн дагуу шүүхэд нэхэмжлэл гаргахаа мэдэгдэж байна.


Баянзүрх дүүргийн 14 дүгээр хорооны иргэн Г.Тулга